عیدِ غدیر کی تقریب، سید کمیل حیدر شاہ نے کیک کاٹا

سکھر ( رپورٹ اسلم سومرو) چیئرمین ضلع کونسل سکھر سید کمیل حیدر شاہ نے قصرِ ناصر ہاؤس روہڑی میں 18 ذوالحج، جشنِ تاجِ ولایتِ امیرالمؤمنین حضرت علی ابنِ ابی طالبؑ اور عیدِ سعیدِ غدیر کی پُرمسرت مناسبت سے منعقدہ تقریب میں کیک کاٹا۔ اس موقع پر عیدِ غدیر کی خوشیوں کا اظہار کرتے ہوئے شرکاء نے حضرت علیؑ کی عظیم خدمات، کردار اور تعلیمات کو خراجِ عقیدت پیش کیا تقریب میں سیاسی، سماجی اور مذہبی شخصیات سمیت مختلف شعبہ ہائے زندگی سے تعلق رکھنے والے افراد نے شرکت کی۔ شرکاء سے گفتگو کرتے ہوئے سید کمیل حیدر شاہ نے کہا کہ عیدِ غدیر امتِ مسلمہ کے لیے اتحاد، اخوت، محبت اور حق و صداقت کا پیغام لے کر آتی ہے۔ انہوں نے کہا کہ حضرت علیؑ کی سیرت انسانیت، عدل، رواداری اور خدمتِ خلق کا بہترین نمونہ ہے، جس پر عمل پیرا ہو کر معاشرے میں بھائی چارے اور ہم آہنگی کو فروغ دیا جا سکتا ہے انہوں نے مزید کہا کہ ہمیں چاہیے کہ حضرت علیؑ کی تعلیمات اور ان کے سنہری اصولوں کو اپنی عملی زندگی کا حصہ بنائیں تاکہ ایک پرامن، منصفانہ اور فلاحی معاشرے کی تشکیل ممکن ہو سکے۔ تقریب کے اختتام پر ملک و قوم کی سلامتی، ترقی، خوشحالی اور امتِ مسلمہ کے اتحاد کے لیے خصوصی دعائیں بھی کی گئیں۔