امریکا آبنائے ہرمز کھلوانے کے لیے چین سے بھیک مانگ رہا ہے، ایرانی وزیر خارجہ کا دعویٰ

ایران کے وزیر خارجہ عباس عراقچی نے کہا ہے کہ آبنائے ہرمز امریکا اور اس کے اتحادیوں کے سوا دیگر ممالک کے لیے کھلی ہے۔ ان کا کہنا تھا کہ امریکا اس اہم بحری گزرگاہ کو کھلوانے کے لیے دوسرے ممالک حتیٰ کہ چین سے بھی مدد مانگنے پر مجبور ہو چکا ہے۔

اپنے بیان میں انہوں نے کہا کہ خطے میں امریکا کی سکیورٹی چھتری کمزور پڑ چکی ہے اور اس میں کئی خامیاں سامنے آ گئی ہیں، جس کے باعث یہ تحفظ فراہم کرنے کے بجائے مزید مسائل پیدا کر رہی ہے۔

ایرانی وزیر خارجہ نے خطے کے ممالک پر زور دیا کہ وہ امریکا اور اس کے اتحادیوں کو خطے سے نکالیں، کیونکہ ان کی توجہ صرف اسرائیل کے مفادات کے تحفظ پر مرکوز ہے۔

انہوں نے مزید کہا کہ امریکا نے جمعے کے روز راس الخیمہ اور دبئی کے قریب حملے کیے جبکہ پڑوسی ممالک کی سرزمین سے ہائی موبیلیٹی راکٹ سسٹم بھی داغے جا رہے ہیں۔