تربت ،سکیورٹی فورسز کی گاڑی پر حملہ ،گیس بازورز نذرآتش ،تین اہلکار زخمی

ضلع کیچ کے مختلف علاقوں میں تخریب کاری کے دو الگ الگ واقعات پیش آئے ہیں جن میں سکیورٹی فورسز کی گاڑی کو نشانہ بنایا گیا اور دو گیس باوزر گاڑیوں کو آگ لگا دی گئی۔ سکیورٹی ذرائع کے مطابق ضلع کیچ کے علاقے تجابان میں معمول کے گشت پر مامور سیکیورٹی فورسز کی گاڑی پر نامعلوم مسلح افراد نے حملہ کر دیا، جس کے نتیجے میں تین سیکیورٹی اہلکار زخمی ہو گئے۔ واقعے کے فورا بعد امدادی ٹیمیں موقع پر پہنچ گئیں اور زخمیوں کو طبی امداد کے لیے قریبی ہسپتال منتقل کر دیا۔دوسری جانب بلیدہ کراس کے قریب مسلح افراد نے دو گیس بازر گاڑیوں کو روک کر فائرنگ کی اور بعد ازاں انہیں نذرِ آتش کر کے موقع سے فرار ہوگئے۔ ابتدائی اطلاعات کے مطابق گاڑیوں کو مکمل طور پر جلانے سے بھاری نقصان ہوا ہے تاہم خوش قسمتی سے کوئی جانی نقصان نہیں ہوا۔ دونوں واقعات کے بعد سیکیورٹی فورسز نے علاقے کو گھیرے میں لے کر حملہ آوروں کی گرفتاری کے لیے وسیع پیمانے پر سرچ آپریشن شروع کر دیا ہے جبکہ حکام ان واقعات کے محرکات کی تحقیقات کر رہے ہیں۔