سمنگلی روڈ پر فائرنگ، سابق ایس ایچ او میٹھا خان قتل

کوئٹہ: سمنگلی روڈ پر بورڈ آفس کے قریب نامعلوم افراد کی فائرنگ سے سابق ایس ایچ او اور سی ٹی ڈی میں تعینات انسپکٹر میٹھا خان جاں بحق ہوگئے۔

سیکیورٹی ذرائع کے مطابق انسپکٹر میٹھا خان بازار سے اپنے گھر جا رہے تھے کہ اسی دوران نامعلوم مسلح افراد نے ان پر فائرنگ کر دی جس کے نتیجے میں وہ موقع پر ہی جاں بحق ہوگئے۔

واقعے کے بعد لاش کو سول ہسپتال کوئٹہ منتقل کر دیا گیا۔ اطلاع ملتے ہی پولیس اور سیکیورٹی فورسز جائے وقوعہ پر پہنچ گئیں اور علاقے کو گھیرے میں لے کر مزید تحقیقات شروع کر دی ہیں۔

پولیس کے مطابق حملہ آوروں کی تلاش کے لیے مختلف مقامات پر ناکہ بندی کر دی گئی ہے جبکہ واقعے کی وجوہات جاننے کے لیے تحقیقات جاری ہیں۔