نوزائیدہ پودوں کی دیکھ بھال کو ہر صورت یقینی بنایا جائے،چیف سیکرٹری بلوچستان

چیف سیکریٹری بلوچستان شکیل قادر خان نے جمعرات کے روز ماحولیاتی تحفظ, آلودگی کے خاتمے اور عوام کو صحت مند ماحول کی فراہمی کے سلسلے میں موسم بہار شجر کاری مہم کا باقاعدہ آغاز درخت لگا کر کیا۔ یہ اقدام صوبے بھر میں سبزہ زاروں کی توسیع اور موسمیاتی تبدیلیوں سے نمٹنے کی وسیع حکمت عملی کا حصہ ہے، جس میں حکومتی عہدیداروں، عوام اور نوجوانوں کی بھرپور شرکت کو یقینی بنایا جائے گا۔ اس موقع پر اظہار خیال کرتے ہوئے چیف سیکریٹری نے کہا کہ جنگلات اور ماحولیات کا تحفظ صرف حکومت کی ذمہ داری نہیں بلکہ عوام کو بھی اس سلسلے میں سنجیدگی سے کردار ادا کرنے کی ضرورت ہے اور انہیں شجر کاری مہم میں بڑھ چڑھ کر حصہ لینا چاہیے۔ عوام کو نہ صرف نئے پودے لگانے چاہئیں بلکہ اپنے گھروں اور گردو نواح میں پہلے سے موجود پودوں کی تناور درخت بننے تک حفاظت بھی کرنی چاہیے۔ اس موقع پر چیف سیکریٹری نے متعلقہ حکام کو ہدایت کی کہ نوزائیدہ پودوں کی دیکھ بھال کو ہر صورت یقینی بنایا جائے۔ اس موقع پر سیکرٹری جنگلات عمران گچکی و دیگر بھی موجود تھے