میانوالی نے 4 سال پنجاب اور پاکستان پر حکومت کی لیکن یہاں ترقی نہ آسکی: مریم نواز
میانوالی: وزیراعلیٰ پنجاب مریم نے کہا ہے ہےکہ میانوالی نے 4 سال پنجاب اور پاکستان پر حکومت کی لیکن یہاں ترقی نہ آسکی۔
میانوالی میں جلسے سے خطاب کرتے ہوئے مریم نواز نے کہا کہ وہ دن چلے گئے جب لوگ میانوالی سے ووٹ لے کر چلے جاتے تھے، جو لوگ کہتے تھے کہ (ن) لیگ کے دور میں صرف لاہور میں ترقی ہوئی وہ میانوالی کو دیکھ لیں۔
انہوں نے کہا کہ گرین بس اور میڈیکل اسپتال سمیت جو سہولیات لاہور میں ہیں وہ ہی میانوالی کو بھی دی ہے، دعوؤں پر نہیں عملی اقدامات پر یقین رکھتی ہوں، اللہ تعالی نے تین سال اور دیے تو پنجاب کی قسمت بدل جائے گی، میانوالی اب محروم نہیں رہے گا۔
مریم نواز نے عمران خان کا نام لیے بغیر طنز کیا کہ میانوالی نے 4 سال پنجاب اور پاکستان پر حکومت کی لیکن یہاں ترقی نہ آسکی لہٰذا میانوالی والوں اب کی بار کسی فراڈ کو ووٹ مت دینا۔
اس کے علاوہ مریم نواز نے میانوالی میں کالج آف الائیڈ پرفیشنلز ، زرعی اور لا کالج بنانے کا اعلان بھی کیا۔
