وزیراعلیٰ پنجاب کے دورہ کوئٹہ سے عوام کے حوصلے بلند ہوئے ،جمال شاہ کاکڑ

پاکستان مسلم لیگ (ن)بلوچستان کے جنرل سیکرٹری اور رکن قومی اسمبلی جمال شاہ کاکڑ نے وزیراعلی پنجاب مریم نواز شریف کے دورہ کوئٹہ کو خوش آئند اور تاریخی قرار دیتے ہوئے کہا ہے کہ اس دورے نے بلوچستان کے عوام کے حوصلے بلند کیے ہیں اور صوبے کو قومی یکجہتی کا واضح پیغام ملا ہے۔اپنے بیان میں وزیراعلی پنجاب کی جانب سے بلوچستان میں دہشت گردی کے خلاف خدمات انجام دینے والی سیکیورٹی فورسز کیلئے10 ارب روپے کی معاونت کا اعلان ایک جرات مندانہ، بروقت اور قابلِ تحسین اقدام قرار دیا۔ انہوں نے کہا کہ بلوچستان اس وقت جن سنگین سیکیورٹی چیلنجز سے دوچار ہے، ایسے میں پنجاب حکومت کی جانب سے عملی تعاون بین الصوبائی ہم آہنگی کی بہترین مثال ہے۔انہوں نے کہا کہ شیخ محمد بن زید النہیان ہسپتال کوئٹہ میں بیگم کلثوم نواز پیڈ کارڈیالوجی بلاک کا افتتاح صوبے کے شعبہ صحت کے لیے ایک اہم سنگِ میل ہے۔ اس جدید بلاک کے قیام سے نہ صرف بلوچستان بلکہ ملحقہ علاقوں کے ہزاروں بچوں کو دل کے امراض کے علاج کی معیاری سہولت میسر آئے گی، جو ماضی میں بڑے شہروں تک محدود تھی۔جمال شاہ کاکڑ نے کہا کہ بیگم کلثوم نواز مرحومہ کا نام اس منصوبے سے منسوب کرنا عوامی خدمت، ہمدردی اور فلاحی سیاست کی علامت ہے۔ انہوں نے کہا کہ مسلم لیگ (ن)کی قیادت ہمیشہ عوامی فلاح، صحت اور ترقی کو ترجیح دیتی آئی ہے اور مریم نواز شریف اسی وژن کو عملی شکل دے رہی ہیں۔انہوں نے مزید کہا کہ وزیراعلی پنجاب کا یہ دورہ اس بات کا ثبوت ہے کہ مسلم لیگ(ن)بلوچستان کو ملک کا پسماندہ صوبہ نہیں بلکہ قومی ترقی کا برابر کا شراکت دار سمجھتی ہے۔ جمال شاہ کاکڑ نے امید ظاہر کی کہ مستقبل میں بھی پنجاب حکومت بلوچستان کے عوام کے لیے ترقیاتی منصوبوں، صحت، تعلیم اور سیکیورٹی کے شعبوں میں تعاون جاری رکھے گی۔آخر میں انہوں نے کہا کہ پاکستان مسلم لیگ (ن)بلوچستان صوبے میں امن، ترقی اور خوشحالی کے لیے وفاق اور دیگر صوبوں کے ساتھ مل کر اپنا بھرپور کردار ادا کرتی رہے گی۔