اگر دہشتگرد سرنڈرکرکےقومی دھارے میں شامل ہو جائیں تو حکومت سے بات کی جاسکتی ہے، چیئرمین اے آرڈی سی خیبرپختونخوا

پشاور: خیبرپختونخوا کے 12 دہشت گردی سے متاثرہ اضلاع کے لیے قائم ایریا ریپریزنٹیٹو اینڈ ڈویلپمنٹ کونسل (اے آر ڈی سی) کے چیئرمین انجینئر شوکت اللہ نے کہا ہے کہ اگر دہشت گرد ہتھیار ڈال کر قومی دھارے میں شامل ہوجائیں اور پُرامن زندگی گزارنے پر آمادہ ہوں تو حکومت سے بات چیت کی جاسکتی ہے۔

جیو نیوز سے گفتگو کرتے ہوئے انجینئر شوکت اللہ نے کہا کہ دہشت گردوں کو علاقے چھوڑنے کا کہا گیا تھا، تاہم ان کی آبادیوں میں موجودگی کے باعث سکیورٹی فورسز کو کارروائیوں میں مشکلات پیش آتی ہیں۔ ان کے مطابق مساجد اور مدارس میں پناہ لینے کی وجہ سے بھی آپریشنز پیچیدہ ہوجاتے ہیں۔

چیئرمین اے آر ڈی سی نے بتایا کہ دہشت گردوں کے خلاف انٹیلی جنس بنیادوں پر کارروائیاں جاری ہیں۔ انہوں نے الزام عائد کیا کہ بھارت افغانستان کے راستے دہشت گردوں کی مالی معاونت کررہا ہے۔ ان کا کہنا تھا کہ دہشت گردوں کو اپنے ہم وطنوں کے خلاف تشدد کا سلسلہ بند کرنا چاہیے۔

انجینئر شوکت اللہ نے واضح کیا کہ ہتھیار ڈالنے اور پُرامن زندگی اختیار کرنے والوں سے بات چیت کی گنجائش موجود ہے، تاہم سرنڈر نہ کرنے والوں کے خلاف کارروائیاں جاری رہیں گی۔ ان کے مطابق ریاست کے خلاف ہتھیار اٹھانے والوں کے معاملے میں زیرو ٹالرنس کی پالیسی ہے۔

انہوں نے مزید کہا کہ دہشت گردی سے متاثرہ اضلاع میں ترقیاتی کاموں کو ترجیح دی جائے گی اور ضرورت کے مطابق نئے اسکولوں اور اسپتالوں کی تعمیر بھی کی جائے گی۔