عسکری طاقت ڈیڑھ گنا تک پہنچ گئی ہے، جنگ بڑھی تو سرپرائز دیں گے، ترجمان پاسداران انقلاب

تہران (ویب ڈیسک): ایران کی پاسداران انقلاب کے ترجمان بریگیڈیئر جنرل حسین محیبی نے دعویٰ کیا ہے کہ فورس کی عسکری طاقت میں ماضی کے مقابلے میں ڈیڑھ گنا تک اضافہ ہوا ہے اور جنگ میں شدت آنے کی صورت میں مخالفین کو حیران کن صلاحیتوں کا سامنا کرنا پڑ سکتا ہے۔

ایرانی ترجمان کے مطابق پاسداران انقلاب کی عسکری صلاحیتوں میں مقداری اور معیاری دونوں سطحوں پر بہتری آئی ہے۔ ان کا کہنا تھا کہ میزائلوں، ڈرونز اور دیگر فوجی سازوسامان کی تیاری مسلسل جاری ہے اور اس شعبے میں مزید توسیع بھی کی گئی ہے۔

حسین محیبی نے دعویٰ کیا کہ ایرانی ہتھیاروں کی مار کرنے کی حد، اہداف کو درست نشانہ بنانے کی صلاحیت اور تباہ کن طاقت میں اضافہ کیا گیا ہے، جبکہ نئے ہتھیاروں کی تیاری پر بھی کام جاری ہے۔

ترجمان نے خبردار کیا کہ اگر جنگ میں مزید شدت آئی تو پاسداران انقلاب ایسی نئی صلاحیتیں اور ہتھیار سامنے لا سکتی ہے جو مخالفین کے لیے غیر متوقع ہوں گے۔ تاہم، انہوں نے ان مبینہ نئی صلاحیتوں کی تفصیلات بیان نہیں کیں۔