پاکستان سعودی عرب کی سلامتی و خودمختاری کیلیے شانہ بشانہ کھڑا ہے، وزیراعظم

اسلام آباد: وزیراعظم شہباز شریف نے کہا ہے کہ پاکستان سعودی عرب کی سلامتی، خودمختاری اور علاقائی سالمیت کے تحفظ کے لیے برادر ملک کے ساتھ کھڑا ہے۔ انہوں نے سعودی عرب کے خلاف حوثی حملوں میں اضافے کی مذمت کرتے ہوئے کہا کہ پاکستان اور سعودی عرب ہمیشہ مشکل وقت میں ایک دوسرے کے ساتھ رہے ہیں۔

وزیراعظم ہاؤس کے مطابق سعودی عرب کے نوتعینات سفیر ڈاکٹر راجح طامی البقمی نے وزیراعظم شہباز شریف سے ملاقات کی۔ اس موقع پر وزیراعظم نے سعودی سفیر کا خیرمقدم کیا اور نئی ذمہ داریاں سنبھالنے پر مبارکباد دی۔

ملاقات کے دوران پاکستان اور سعودی عرب کے تاریخی اور برادرانہ تعلقات، مختلف شعبوں میں دوطرفہ تعاون کے فروغ اور باہمی روابط کو مزید مستحکم بنانے پر تبادلہ خیال کیا گیا۔ وزیراعظم نے اس عزم کا اعادہ کیا کہ دونوں ممالک کے درمیان تعاون کو وسعت دینے کے لیے موجودہ ادارہ جاتی نظام کو مزید مضبوط بنایا جائے گا۔

شہباز شریف نے سعودی عرب کے خلاف حوثی حملوں میں حالیہ اضافے کی شدید مذمت کرتے ہوئے کہا کہ ان حملوں کے نتیجے میں قیمتی جانوں کا نقصان ہوا اور پاکستانی شہریوں سمیت متعدد بے گناہ افراد زخمی ہوئے۔ انہوں نے زور دیا کہ پاکستان سعودی عرب کی سلامتی اور خودمختاری کے تحفظ کے لیے اس کے ساتھ کھڑا رہے گا۔

وزیراعظم نے اسٹریٹجک باہمی دفاعی معاہدے اور مشترکہ دفاعی تعاون کو دونوں ممالک کے تعلقات میں اہم سنگ میل قرار دیتے ہوئے کہا کہ یہ اقدامات علاقائی امن اور سلامتی کے لیے مشترکہ عزم کی عکاسی کرتے ہیں۔

انہوں نے سعودی قیادت کی جانب سے پاکستان کو فراہم کی جانے والی طویل مدتی اقتصادی اور مالی معاونت پر شکریہ ادا کیا اور سعودی سفیر کے لیے نئی ذمہ داریوں میں کامیابی کی نیک خواہشات کا اظہار کیا۔

وزیراعظم نے یقین دلایا کہ پاکستان سعودی عرب کے ساتھ دیرینہ برادرانہ تعلقات کو مزید مضبوط بنانے اور باہمی تعاون کو فروغ دینے کے لیے اپنا بھرپور کردار ادا کرتا رہے گا۔