مسلم باغ میں ڈائنامائٹ کی بندش کے خلاف آل پارٹیز اجلاس، کرومائٹ مائننگ کے مسائل پر غور

آج پشتونخوا نیشنل عوامی پارٹی کے دفتر میں ڈائنامائٹ کی بندش اور اس کے باعث کرومائٹ مائننگ سے وابستہ کاروباری سرگرمیوں و روزگار کو درپیش مسائل کے حوالے سے ایک اہم آل پارٹیز اجلاس منعقد ہوا۔
اجلاس کی صدارت جمعیت علمائے اسلام کے تحصیل جنرل سیکرٹری حاجی اللہ داد نے کی۔ اجلاس میں مختلف سیاسی جماعتوں کے نمائندگان، کرومائٹ پروسیسنگ پلانٹس ایسوسی ایشن اور انجمنِ تاجران کے ذمہ داران نے شرکت کی، جہاں مسئلے کے حل کے لیے مختلف تجاویز پر غور و خوض کیا گیا۔

اجلاس میں اس بات پر زور دیا گیا کہ تمام متعلقہ فریقوں کی مشاورت سے ایک متفقہ لائحۂ عمل ترتیب دیا جائے، تاکہ قانونی کرومائٹ مائننگ کی بحالی اور اس سے وابستہ مزدوروں و کاروباری طبقے کے مسائل کے حل کے لیے مؤثر اقدامات کیے جا سکیں۔

آئندہ کے لائحۂ عمل اور مزید مشاورت کے لیے بروز سوموار باچا خان مرکز مسلم باغ میں تین بجے ایک اور اہم اجلاس طلب کیا گیا ہے جس میں تمام پارٹیز کی شرکت لازمی ہوگی۔

امید ہے کہ باہمی مشاورت، اتحاد اور مشترکہ کوششوں سے اس اہم مسئلے کے حل کی جانب پیش رفت ہوگی۔