محمود اچکزئی کی تحریک تحفظ آئین کے رہنماؤں کو فوری اسلام آباد پہنچنے کی ہدایت

اسلام آباد: چیئرمین تحریک تحفظ آئین پاکستان محمود خان اچکزئی نے اپوزیشن اتحاد میں شامل تمام جماعتوں کے رہنماؤں سے رابطہ کرتے ہوئے انہیں جلد از جلد اسلام آباد پہنچنے کی ہدایت کردی۔

ذرائع کے مطابق اپوزیشن اتحاد کے اجلاس میں خیبرپختونخوا میں گورنر راج یا ایمرجنسی کے ممکنہ نفاذ سمیت ملک کی مجموعی سیاسی صورتحال پر تفصیلی مشاورت کی جائے گی، جبکہ آئندہ کی سیاسی حکمت عملی اور مستقبل کے لائحہ عمل سے متعلق اہم فیصلے بھی متوقع ہیں۔

ذرائع کا کہنا ہے کہ ملکی سیاسی صورتحال کے حوالے سے پارلیمان میں اپوزیشن اتحاد کی مشاورت جاری ہے۔ اس سلسلے میں محمود خان اچکزئی نے اپوزیشن جماعتوں اور پاکستان تحریک انصاف کو تمام دستیاب فورمز پر سیاسی جدوجہد جاری رکھنے کی ہدایت کی ہے۔

ذرائع کے مطابق محمود خان اچکزئی نے عدالتی اور پارلیمانی فورمز کے ساتھ سڑکوں پر بھی سیاسی جدوجہد جاری رکھنے پر زور دیا ہے۔ ان کی ہدایات کے بعد پی ٹی آئی ارکان کی جانب سے عدالتی فورم سے رجوع کرنے سمیت آئندہ کے اقدامات پر غور کیا جائے گا۔

اپوزیشن اتحاد کے اجلاس میں ملک کی موجودہ سیاسی صورتحال اور آئندہ کے لائحہ عمل کے حوالے سے مزید اہم فیصلے کیے جانے کا امکان ہے۔