شہریوں کے جان و مال کا تحفظ اور قانون پر عملدرآمد انتظامیہ کی ذمہ داری ہے، کنٹونمنٹ بورڈ

فیصل کنٹونمنٹ بورڈ کا قابلِ تحسین اقدام
غیر قانونی ایل پی جی اسٹالز کے خلاف بھرپور کارروائی، عوامی مفاد میں مؤثر قدم

کراچی (سید عاصم رضا زیدی) کراچی جیسے گنجان آباد شہر میں شہریوں کی جان و مال کا تحفظ صرف ایک انتظامی ذمہ داری نہیں بلکہ ایک اجتماعی ضرورت ہے۔ ایسے ماحول میں فیصل کنٹونمنٹ بورڈ کی جانب سے غیر قانونی ایل پی جی اسٹالز، تجاوزات اور غیر مجاز کاروباری سرگرمیوں کے خلاف بھرپور کارروائی یقیناً ایک قابلِ تحسین اقدام ہے۔
سی ای او کنٹونمنٹ بورڈ فیصل کی ہدایت پر انتظامیہ نے مختلف علاقوں میں کارروائی کرتے ہوئے متعدد غیر قانونی ایل پی جی اسٹالز اور تجاوزات کو ہٹایا، جبکہ متاثرہ مقامات کی صفائی اور عوامی گزرگاہوں کو بھی بحال کیا گیا۔ یہ کارروائی اس بات کا واضح ثبوت ہے کہ جب انتظامیہ عوامی مفاد کو ترجیح دے اور قانون پر عمل درآمد کو یقینی بنائے تو شہری مسائل میں نمایاں کمی لائی جا سکتی ہے۔
اس کارروائی پر شہریوں کی جانب سے سی ای او کنٹونمنٹ بورڈ فیصل اور ان کی پوری انتظامی ٹیم کو خراجِ تحسین پیش کرنا بجا ہے۔ ایل پی جی ایک حساس اور آتش گیر ایندھن ہے، اس لیے اس کا کاروبار حفاظتی اصولوں اور مقررہ قوانین کے مطابق ہونا انتہائی ضروری ہے۔ غیر قانونی اور غیر محفوظ اسٹالز نہ صرف شہریوں کے لیے مشکلات پیدا کرتے ہیں بلکہ کسی بڑے حادثے کا سبب بھی بن سکتے ہیں۔
تاہم عوامی مفاد کا تقاضا یہ بھی ہے کہ کارروائی کے ساتھ انصاف اور توازن کا دامن ہاتھ سے نہ چھوڑا جائے۔ جو دکاندار تمام قانونی تقاضے، حفاظتی شرائط اور کنٹونمنٹ بورڈ کے قواعد پورے کرنے کے لیے تیار ہیں، ان کے معاملات کو بھی مثبت انداز میں دیکھا جانا چاہیے۔ انہیں قانونی طریقہ کار مکمل کرکے کاروبار جاری رکھنے کا موقع دیا جائے تاکہ ایک طرف شہریوں کی حفاظت یقینی بنے اور دوسری طرف غریب اور متوسط طبقے کا جائز روزگار بھی متاثر نہ ہو۔
یہ پہلو اس لیے بھی اہم ہے کہ آج کراچی کے شہری پہلے ہی سوئی گیس کی طویل اور غیر اعلانیہ بندش کے باعث شدید مشکلات سے دوچار ہیں۔ رات کے اوقات میں گیس کی عدم دستیابی، خصوصاً کھانا پکانے کے وقت، گھریلو صارفین کے لیے ایک بڑا مسئلہ بن چکی ہے۔ ایسے حالات میں ایل پی جی شہریوں کے لیے ایک اہم متبادل ضرورت بن گئی ہے۔
لہٰذا ضرورت اس امر کی ہے کہ غیر قانونی، غیر محفوظ اور خطرناک ایل پی جی اسٹالز کے خلاف کارروائی بلاامتیاز جاری رکھی جائے، مگر جو کاروباری مراکز قانون کے مطابق کام کرنا چاہتے ہیں، ان کے لیے واضح اور آسان قانونی طریقہ کار بھی وضع کیا جائے۔
انتظامیہ کا اصل امتحان یہی ہے کہ وہ قانون کی بالادستی کے ساتھ عوامی ضرورت، شہری سلامتی اور روزگار کے درمیان ایک متوازن راستہ اختیار کرے۔ فیصل کنٹونمنٹ بورڈ کی حالیہ کارروائی اس حوالے سے ایک مثبت مثال بن سکتی ہے۔
ہم سی ای او کنٹونمنٹ بورڈ فیصل، متعلقہ افسران اور تمام اہلکاروں کو اس مؤثر کارروائی پر خراجِ تحسین پیش کرتے ہیں اور امید کرتے ہیں کہ تجاوزات کے خاتمے، صفائی ستھرائی، شہری سہولتوں اور عوام کے جان و مال کے تحفظ کے لیے یہ سلسلہ آئندہ بھی اسی جذبے کے ساتھ جاری رہے گا۔
عوامی خدمت کا اصل حسن یہی ہے کہ قانون بھی قائم رہے، شہری بھی محفوظ رہیں اور جائز روزگار بھی بلاوجہ متاثر نہ ہو۔ فیصل کنٹونمنٹ بورڈ کا یہ اقدام اسی متوازن سوچ کی جانب ایک خوش آئند قدم ہے۔