بلوچستان کے اراکین اسمبلی کی ہر فورم پر تذلیل افسوسناک ہے، بی این پی

بلوچستان نیشنل پارٹی کے مرکزی رہنما ساجد ترین ایڈووکیٹ نے کہا ہے کہ یہ امر انتہائی افسوسناک ہے کہ بلوچستان کے اراکین اسمبلی کو ہر فورم پر تذلیل اور بے عزتی کا سامنا کرنا پڑ رہا ہے، گزشتہ روز ایک رکن اسمبلی نے اسمبلی فلور پر اپنے پاسپورٹ کے معاملے پر معذرت کی، حالانکہ جس شخص یا افسر کی جانب سے ان کا پاسپورٹ ای سی ایل میں شامل کیا گیا، اسے وضاحت اور معذرت کرنی چاہیے تھی‘یہ با ت انہوں نے اپنے جاری کرتے ہوئے کیا ساجد ترین ایڈوکیٹ نے کہا ہے کہ بلوچستان اسمبلی کے رکن کو ایئرپورٹ پر روکنے اور ان کے پاسپورٹ کے حوالے سے پیدا ہونے والی صورتحال نے کئی سوالات کو جنم دیا ہے۔ افسوسناک امر یہ ہے کہ معاملے کی اصل وجہ اور ذمہ داری کا تعین کرنے کے بجائے رکن اسمبلی کو ہی اسمبلی کے فلور پر معافی مانگنے پر مجبور ہونا پڑا۔ساجد ترین ایڈووکیٹ نے کہا کہ منتخب اراکین اسمبلی عوام کے ووٹ سے ایوان میں پہنچتے ہیں اور ان کے ساتھ کسی بھی معاملے میں آئین، قانون اور پارلیمانی وقار کے تقاضوں کو ملحوظ خاطر رکھنا ضروری ہے۔ اگر کسی رکن اسمبلی کے خلاف کوئی قانونی یا انتظامی کارروائی کی جاتی ہے تو اس کی وجوہات اور شواہد بھی واضح کیے جانے چاہئیں۔انہوں نے کہا کہ اگر کسی رکن اسمبلی کا نام ای سی ایل یا کسی دیگر فہرست میں شامل کیا گیا تھا تو اس کا قانونی جواز اور ذمہ دار ادارے کو اس بارے میں ایوان اور متعلقہ رکن کو وضاحت دینی چاہیے تھی۔ منتخب نمائندوں کی تذلیل اور ان کے ساتھ ناروا سلوک کا تاثر پیدا ہونا جمہوری اداروں کے وقار کے لیے بھی مناسب نہیں۔ساجد ترین ایڈووکیٹ نے کہا کہ بلوچستان پہلے ہی مختلف مسائل اور مشکلات سے دوچار ہے، ایسے میں اگر عوام کے منتخب نمائندوں کو بھی عزت اور وقار کے ساتھ کام کرنے کا ماحول فراہم نہیں کیا جائے گا تو اس کے اثرات براہ راست عوام پر مرتب ہوں گے۔ انہوں نے کہا کہ جب منتخب اراکین کی عزت و تکریم متاثر ہوگی تو عام شہری کے حقوق اور عزت کا تحفظ بھی ایک بڑا سوال بن جائے گا۔انہوں نے مطالبہ کیا کہ واقعے کی مکمل وضاحت سامنے لائی جائے، ذمہ داروں کا تعین کیا جائے اور آئندہ بلوچستان کے منتخب اراکین اسمبلی کے ساتھ آئین و قانون کے مطابق باوقار طرز عمل یقینی بنایا جائے۔