پاکستان میں کوئی اقلیت نہیں، سب برابر کے پاکستانی ہیں، آئین و اسلام نے اقلیتوں کو مکمل حقوق دیے ہیں، جمال شاہ کاکڑ

کوئٹہ: پاکستان مسلم لیگ (ن) بلوچستان کے جنرل سیکرٹری و رکن قومی اسمبلی جمال شاہ کاکڑ نے کہا ہے کہ پاکستان میں کوئی اقلیت نہیں، ہم سب پاکستانی ہیں۔ پاکستان کے آئین اور اسلام نے اقلیتوں کو جو حقوق دیے ہیں، وہ شاید ہی کسی اور نے دیے ہوں۔ مسلم لیگ (ن) اپنے مشکل وقت کے ساتھیوں اور قربانیاں دینے والوں کو کبھی فراموش نہیں کرتی، جبکہ سیاسی عمل میں سرگرم خواتین کی شرکت دیگر خواتین کے لیے حوصلے کا باعث ہے۔ان خیالات کا اظہار انہوں نے کوئٹہ پریس کلب میں پاکستان مسلم لیگ (ن) کے خواتین و اقلیتی ونگ کے زیر اہتمام منعقدہ خواتین کنونشن سے خطاب کرتے ہوئے کیا۔ اس موقع پر رکن قومی اسمبلی اختر بی بی، سابق وفاقی وزیر خلیل جارج، حیدر خان اچکزئی، فاطمہ خان، شاکر محمد حسنی، نثار خان اچکزئی، زینت شاہوانی سمیت دیگر رہنما اور کارکنان بھی موجود تھے۔جمال شاہ کاکڑ نے کہا کہ بعض حلقوں کی جانب سے بلوچستان کے حالات خراب ہونے کی بات کی جاتی ہے، تاہم مسلم لیگ (ن) بلوچستان میں سیاسی طور پر متحرک ہے اور گزشتہ دو ہفتوں سے مسلسل شمولیتوں کا سلسلہ جاری ہے۔ انہوں نے کہا کہ بڑی تعداد میں لوگوں کی مسلم لیگ (ن) میں شمولیت اور سیاسی سرگرمیوں میں شرکت اس بات کا ثبوت ہے کہ بلوچستان کے عوام پارٹی قیادت سے محبت کرتے ہیں۔انہوں نے کہا کہ بلوچستان کے عوام میاں نواز شریف، میاں شہباز شریف اور مریم نواز سے محبت کرتے ہیں، جس کا اظہار مختلف سیاسی پروگراموں میں خواتین کی بڑی تعداد میں شرکت سے بھی ہوتا ہے۔ انہوں نے کہا کہ مسلم لیگ (ن) کی فعال خواتین سیاسی عمل میں دیگر خواتین کے لیے حوصلہ اور رہنمائی کا ذریعہ ہیں۔اس موقع پر رکن قومی اسمبلی اختر بی بی نے کہا کہ اقلیتی خواتین پاکستان کی ترقی اور خوشحالی میں اہم کردار ادا کر رہی ہیں۔ انہوں نے خواتین ونگ کی عہدیداروں اور کارکنوں کو خراج تحسین پیش کرتے ہوئے کہا کہ یہی خواتین ہر مشکل اور اہم موقع پر مسلم لیگ (ن) کے ساتھ کھڑی رہی ہیں اور پارٹی کو بھرپور سپورٹ فراہم کرتی رہی ہیں۔