سپریم لیڈر کا امریکا کو خطے سے نکالنے کا عزم، ٹرمپ کا ایران کو ‘نرمی دینے’ سے انکار

ایران کے سپریم لیڈر مجتبیٰ خامنہ ای نے کہا ہے کہ امریکا کو خطے سے نکال دیا جائے گا، جبکہ امریکی صدر ڈونلڈ ٹرمپ نے ایران کو پابندیوں میں نرمی اور منجمد اثاثے بحال کرنے سمیت کسی بھی رعایت کی پیشکش کی تردید کی ہے۔

مجتبیٰ خامنہ ای نے ایکس پر جاری بیانات میں کہا کہ امریکا کو ایرانی جنگجوؤں اور آبنائے ہرمز کے محافظوں کے ہاتھوں ’’تکلیف دہ ضربیں‘‘ لگی ہیں اور وہ اب بحیرہ عرب سے آگے جانے کی ہمت نہیں کرتا۔

انہوں نے کہا کہ جب بھی امریکا نے یہ خطرہ مول لیا، اسے نقصان ہی اٹھانا پڑا اور وہ دن دور نہیں جب بحیرہ عرب بھی امریکی موجودگی سے پاک ہوجائے گا۔

ایرانی سپریم لیڈر نے اپنے پیغامات میں مزید کہا کہ ایران کے ’’دشمن‘‘ نے اسلامی نظام کی سماجی بنیادوں کو کمزور کرنے کی کوشش کی، تاہم مختلف شعبوں سے تعلق رکھنے والے ایرانی عوام اپنے مؤقف کے دفاع اور آبنائے ہرمز کے تحفظ کے لیے متحد ہیں۔

انہوں نے یہ بھی کہا کہ ایران کو بعض لوگ دنیا کی ’’چوتھی سپر پاور‘‘ سمجھتے ہیں، تاہم ان کے مطابق یہ رائے دنیاوی حساب کتاب کی بنیاد پر قائم کی گئی ہے جبکہ “الہیٰ پیمانوں کے مطابق” ایران “دنیا کی سب سے بڑی طاقت ہے۔”

اسی دوران ایرانی سرکاری خبر رساں ادارے ارنا نے ایک نامعلوم سورس کے حوالے سے رپورٹ کیا کہ اقوام متحدہ کی جنرل اسمبلی کے اجلاس میں شریک ایرانی وفد کا امریکا کے ساتھ مزید مذاکرات کا کوئی منصوبہ نہیں۔