خواتین کیلئے محفوظ سفری سہولت، جناح پیپلز میٹرو ٹرین اہم پیش رفت ہے، ڈاکٹر ربابہ بلیدی

وزیراعلیٰ بلوچستان کی مشیر برائے ویمن ڈویلپمنٹ ڈیپارٹمنٹ ڈاکٹر ربابہ خان بلیدی نے جناح پیپلز میٹرو ٹرین سروس کے آغاز کو شہریوں، خصوصاً خواتین کیلئے جدید، محفوظ اور بااعتماد سفری سہولت کی فراہمی کی جانب اہم پیش رفت قرار دیا ہے۔

ڈاکٹر ربابہ خان بلیدی نے کہا کہ خواتین کیلئے محفوظ اور باوقار پبلک ٹرانسپورٹ کی دستیابی سے ان کی تعلیم، روزگار، کاروبار اور دیگر معاشی و سماجی سرگرمیوں میں شرکت کے مواقع بڑھتے ہیں۔ جناح پیپلز میٹرو ٹرین سروس کے ذریعے خواتین کو شہر کے مختلف علاقوں تک منظم اور بہتر سفری سہولت میسر آئے گی۔

انہوں نے کہا کہ سستی اور معیاری پبلک ٹرانسپورٹ شہریوں کے روزمرہ سفر کو آسان بنانے کے ساتھ وقت اور سفری اخراجات میں بھی کمی کا باعث بنتی ہے۔ خواتین کیلئے بہتر سفری سہولیات ان کی معاشی خودمختاری اور سماجی سرگرمیوں میں مؤثر شرکت کیلئے بھی اہم ہیں۔

مشیر ویمن ڈویلپمنٹ نے سینئر شہریوں اور افراد باہم معذوری کیلئے مفت سفری سہولت کے اعلان کو خوش آئند قرار دیتے ہوئے کہا کہ اس اقدام سے معاشرے کے ان طبقات کی نقل و حرکت آسان ہوگی اور انہیں ضروری خدمات تک رسائی میں مدد ملے گی۔

ڈاکٹر ربابہ خان بلیدی نے کہا کہ شہری ٹرانسپورٹ کے منصوبوں میں خواتین، سینئر شہریوں اور افراد باہم معذوری کی ضروریات کو مدنظر رکھنا جامع اور عوام دوست شہری ترقی کیلئے ضروری ہے۔

انہوں نے کہا کہ جناح پیپلز میٹرو ٹرین سروس سے شہریوں کو بہتر سفری سہولیات میسر آنے کے ساتھ کوئٹہ میں پبلک ٹرانسپورٹ کے نظام میں بھی بہتری آئے گی۔