سیاحت کے فروغ سے معیشت مضبوط ہوگی، فیصل جمالی

پاکستان پیپلز پارٹی کے سینئر رہنما و صوبائی وزیر لائیو اسٹاک سردارزادہ فیصل خان جمالی نے بلوچستان یومِ سیاحت کے موقع پر اپنے پیغام میں کہا ہے کہ بلوچستان قدرتی حسن، تاریخی ورثے اور منفرد ثقافت سے مالا مال صوبہ ہے، جہاں طویل ساحلی پٹی، دلکش پہاڑی سلسلے، تاریخی مقامات اور قدیم ثقافتی روایات سیاحوں کے لیے خصوصی کشش کا باعث ہیں۔انہوں نے کہا کہ بلوچستان میں پائیدار سیاحت کو فروغ دے کر نہ صرف صوبے کے قدرتی و ثقافتی حسن کو ملکی اور عالمی سطح پر اجاگر کیا جا سکتا ہے بلکہ مقامی آبادی کے لیے روزگار کے نئے مواقع بھی پیدا کیے جا سکتے ہیں۔ سیاحت کے شعبے میں سرمایہ کاری سے مقامی معیشت کو مضبوط بنانے اور مختلف علاقوں میں کاروباری سرگرمیوں کے فروغ میں بھی مدد مل سکتی ہے۔سردارزادہ فیصل خان جمالی نے کہا کہ بلوچستان کے مختلف سیاحتی مقامات کو جدید سہولیات سے آراستہ کرنے، انفراسٹرکچر کو بہتر بنانے اور سیاحوں کو محفوظ و سازگار ماحول فراہم کرنے کی ضرورت ہے۔ انہوں نے کہا کہ سیاحتی مقامات کی ترقی میں مقامی آبادی کی شمولیت کو یقینی بنا کر انہیں سیاحت کے معاشی فوائد کا براہِ راست حصہ دار بنایا جا سکتا ہے انہوں نے مزید کہا کہ بلوچستان کا قدرتی حسن اور ثقافتی ورثہ صوبے کی قیمتی پہچان اور قومی اثاثہ ہے، جس کا تحفظ ہم سب کی مشترکہ ذمہ داری ہے۔ پائیدار سیاحت کے فروغ کے ساتھ ماحولیات کے تحفظ، تاریخی مقامات کی نگہداشت اور مقامی ثقافت و روایات کے احترام کو بھی یقینی بنانا ہوگا۔صوبائی وزیر نے کہا کہ بلوچستان میں سیاحت کے وسیع امکانات موجود ہیں، جنہیں مثر منصوبہ بندی اور اجتماعی کاوشوں کے ذریعے بروئے کار لاتے ہوئے صوبے کی ترقی و خوشحالی کے ساتھ ساتھ بلوچستان کا مثبت اور خوبصورت تشخص دنیا کے سامنے مزید نمایاں کیا جا سکتا ہے۔