بلوچستان میں سیکیورٹی فورسز کا بڑا کریک ڈاؤن: 96 گھنٹوں میں 71 بھارتی حمایت یافتہ دہشتگرد ہلاک

کوئٹہ: بلوچستان میں سیکیورٹی فورسز نے دہشتگردوں کے خلاف فیصلہ کن کارروائیاں کرتے ہوئے گزشتہ 96 گھنٹوں کے دوران 71 سے زائد بھارتی حمایت یافتہ دہشتگردوں کو جہنم واصل کر دیا ہے۔

پاک فوج کے شعبہ تعلقات عامہ (آئی ایس پی آر) کے مطابق افغان طالبان حکومت کی جانب سے پاکستان میں دہشتگردی کی سرگرمیوں میں ملوث ہونے اور بھارت کی پشت پناہی و معاونت کے باعث امن و استحکام کو لاحق خطرات سے نمٹنے کے لیے یہ کارروائیاں کی گئیں۔ انٹیلی جنس اداروں کی نشان دہی پر کوئٹہ کے علاقے شعبان، زیارت، نوشکی اور مند میں کامیاب انٹیلی جنس بیسڈ آپریشنز کیے گئے۔

آئی ایس پی آر کے جاری کردہ بیان کے مطابق:

آپریشن شعبان اور زیارت: 21 ستمبر 2026 کو شروع ہونے والے اس آپریشن میں فتنۃ الخوارج اور فتنۃ الہندوستان کے ٹھکانوں کو نشانہ بنایا گیا، جہاں شدید فائرنگ کے تبادلے کے بعد 33 دہشتگرد ہلاک کیے گئے اور بڑی تعداد میں اسلحہ و گولہ بارود برآمد ہوا۔

ضلع نوشکی آپریشن: 25 ستمبر 2026 کو ایک الگ انٹیلی جنس بیسڈ کارروائی کے دوران دہشتگردوں کے ٹھکانے کو مؤثر انداز میں نشانہ بنایا گیا جس میں 11 دہشتگرد ہلاک ہوئے۔

مند کارروائی: مند کے علاقے میں سیکیورٹی فورسز نے کامیاب کارروائی کرتے ہوئے فتنۃ الہندوستان کے مزید 6 دہشتگردوں کو ہلاک کیا۔

مجموعی طور پر گزشتہ 96 گھنٹوں کے دوران کارروائیوں میں 71 سے زائد دہشتگردوں کو ہلاک کیا گیا ہے، جس سے بھارتی سرپرستی میں کام کرنے والی افغان پراکسیز کو کاری ضرب لگی ہے۔ آئی ایس پی آر کا کہنا ہے کہ وفاقی ایپکس کمیٹی سے منظور شدہ ‘عزمِ استحکام’ کے وژن کے تحت ملک سے غیر ملکی سرپرستی سے چلنے والی دہشتگردی کے مکمل خاتمے تک یہ آپریشنز بھرپور عزم کے ساتھ جاری رہیں گے۔