خواتین کی بڑی مشکل آسان! نادرا کی خصوصی نرمی، بغیر برتھ سرٹیفکیٹ شناختی کارڈ حاصل کرنے کا سنہری موقع

اسلام آباد: نیشنل ڈیٹا بیس اینڈ رجسٹریشن اتھارٹی (نادرا) نے ایسے شہریوں کے لیے ایک اہم خصوصی سہولت متعارف کرائی ہے جو پیدائش کا سرٹیفکیٹ نہ ہونے کی وجہ سے اب تک کمپیوٹرائزڈ قومی شناختی کارڈ (CNIC) حاصل کرنے سے محروم تھے۔ یہ سہولت 31 دسمبر 2026 تک دستیاب رہے گی۔

شادی شدہ اور غیر شادی شدہ خواتین کے لیے آسانیاں
یہ پالیسی بالخصوص 18 سال سے زائد عمر کی ان خواتین کے لیے بنائی گئی ہے جن کے پاس برتھ سرٹیفکیٹ موجود نہیں۔

شادی شدہ خواتین: یونین کونسل سے جاری کردہ کمپیوٹرائزڈ نکاح نامہ پیش کرکے نادرا سینٹر سے رجوع کر سکتی ہیں۔ اس کے لیے والد یا والدہ میں سے کسی ایک اور شوہر کا CNIC یا NICOP ہونا لازمی ہے، جبکہ بائیومیٹرک تصدیق کے لیے خاتون کے ہمراہ ان رشتہ داروں کا نادرا سینٹر جانا بھی ضروری ہے۔ والدین یا شوہر کا انتقال ہونے کی صورت میں بھی نادرا ڈیٹا بیس میں ریکارڈ موجود ہونے پر درخواست دی جا سکتی ہے۔

غیر شادی شدہ خواتین: 18 سال سے زائد عمر کی غیر شادی شدہ خواتین بھی اس سہولت سے فائدہ اٹھا سکتی ہیں، جن پر شوہر سے متعلقہ شرط لاگو نہیں ہوگی۔

24 سال سے زائد عمر کے مردوں کے لیے بھی موقع
نادرا نے 24 سال سے زائد عمر کے ایسے مردوں کو بھی اس دائرے میں شامل کیا ہے جنہوں نے کبھی CNIC نہیں بنوایا۔ بشرطیکہ ان کے والد یا والدہ میں سے کسی ایک کے پاس CNIC موجود ہو اور وہ درخواست گزار کے ساتھ نادرا سینٹر جائیں۔ والدین کا انتقال ہو جانے کی صورت میں متعلقہ بھائی یا بہن (جس کے پاس شناختی کارڈ ہو) کے ہمراہ بھی درخواست دی جا سکتی ہے۔

اہم انتباہ اور مستقل شرط
نادرا نے واضح کیا ہے کہ اس سہولت کے تحت بننے والے شناختی کارڈ پر درج ہونے والی ذاتی معلومات (والدین کی تفصیلات، تاریخِ پیدائش اور جائے پیدائش) بعد میں تبدیل نہیں کی جا سکیں گی۔ اس لیے تمام شہریوں کو ہدایت کی گئی ہے کہ وہ درخواست جمع کرواتے وقت معلومات کی درستگی کا خاص خیال رکھیں۔