ملک میں نئے صوبے کیسے بن سکتے ہیں؟ وفاقی وزیر قانون کا اہم بیان سامنے آگیا

اسلام آباد: وفاقی وزیر قانون اعظم نذیر تارڑ نے کہا ہے کہ ملک میں نئے صوبوں یا انتظامی یونٹس کا قیام آئینی طریقہ کار کے تحت ہی ممکن ہے۔

لندن میں میڈیا سے گفتگو کرتے ہوئے اعظم نذیر تارڑ نے کہا کہ نئے صوبے بنانے کے لیے پارلیمنٹ اور متعلقہ صوبائی اسمبلیوں کا متفقہ فیصلہ ضروری ہوگا، جبکہ اس عمل کے لیے آئین میں مقرر کردہ تقاضے اور دو تہائی اکثریت حاصل کرنا لازمی ہے۔

وفاقی وزیر قانون کا کہنا تھا کہ نئے صوبوں کا قیام ایک قانونی اور پارلیمانی عمل ہے، جو اتفاق رائے اور آئینی طریقہ کار کے ذریعے ہی مکمل ہوسکتا ہے۔

آزاد کشمیر کے انتخابات سے متعلق سوال پر انہوں نے کہا کہ وہاں سب سے اہم مرحلہ شفاف اور بروقت انتخابات کا انعقاد تھا، جو پرامن انداز میں مکمل ہوئے۔

اعظم نذیر تارڑ نے مزید کہا کہ حکومت سیاسی مسائل کے حل کے لیے مذاکرات کے راستے پر یقین رکھتی ہے، جبکہ وزیراعظم بھی اپوزیشن کو بات چیت کی دعوت دیتے رہے ہیں۔