باشعور اور تعلیم یافتہ نوجوان بلوچستان کے روشن مستقبل کی ضمانت ہیں، چاکر صدیق بلوچ

پنجگور (نمائندہ خصوصی)
سنیئر صحافی چاکر صدیق بلوچ نے اپنے ایک جامع بیان میں کہا ہے کہ باشعور، تعلیم یافتہ اور منظم نوجوان ہی پنجگور سمیت پورے بلوچستان کے روشن مستقبل کی ضمانت بن سکتے ہیں۔ حکومت اور متعلقہ حکام کو چاہیے کہ وہ نوجوان نسل کو جدید تعلیم اور بہتر روزگار کے مواقع ترجیحی بنیادوں پر فراہم کریں۔انہوں نے اس بات پر زور دیا کہ اگر نوجوانوں کی توانائیوں کو درست سمت دی جائے اور انہیں فنی و تعلیمی میدان میں آگے بڑھنے کے مواقع ملیں، تو علاقہ غربت، جہالت اور بے روزگاری کے اندھیروں سے نکل کر ترقی کی نئی راہوں پر گامزن ہو سکتا ہے۔چاکر صدیق بلوچ کا مزید کہنا تھا کہ تعلیمی اصلاحات، پنجگور کے تعلیمی اداروں کو درپیش مسائل کو حل کر کے معیاری تعلیم کو بلند کیا جائے۔ روزگار کی فراہمی، مقامی سطح پر روزگار اور ہنر مندی کے پروگرامز کا انعقاد یقینی بنایا جائے تاکہ نوجوانوں میں پائی جانے والی مایوسی ختم ہو۔نوجوانوں کا کردار، نوجوان اپنے اندر نظم و ضبط اور شعور پیدا کر کے سماجی و معاشی ترقی میں اپنا مثبت کردار ادا کریں۔انہوں نے اربابِ اختیار سے اپیل کی کہ وہ بلوچستان کے نوجوانوں کے مسائل کو ہنگامی بنیادوں پر حل کرنے کے لیے عملی اقدامات کریں۔