خواتین کی فلاح و بہبود حکومتی ترجیحات میں شامل ہے، ڈاکٹر ربابہ بلیدی

کوئٹہ: وزیراعلیٰ بلوچستان کی مشیر برائے ویمن ڈویلپمنٹ ڈیپارٹمنٹ ڈاکٹر ربابہ خان بلیدی سے محکمہ کے نئے تعینات ہونے والے سیکرٹری شیر شاہ غلزئی نے ملاقات کی، جس میں محکمہ کی کارکردگی، جاری منصوبوں، مختلف پروگرامز اور مجموعی امور پر تفصیلی بریفنگ دی گئی۔

سیکرٹری شیر شاہ غلزئی نے مشیر وزیراعلیٰ کو خواتین کی فلاح و بہبود، ترقی، تحفظ اور انہیں معاشی و سماجی طور پر بااختیار بنانے کے لیے جاری اقدامات سے آگاہ کیا۔

ڈاکٹر ربابہ خان بلیدی نے محکمہ کی کارکردگی کا جائزہ لیتے ہوئے خواتین کی ترقی اور انہیں معاشرے میں مؤثر اور باوقار مقام دلانے کے لیے اقدامات کو مزید مؤثر بنانے پر زور دیا۔

انہوں نے کہا کہ خواتین کی فلاح و بہبود اور انہیں ترقی کے یکساں مواقع کی فراہمی حکومت بلوچستان کی ترجیحات میں شامل ہے۔

مشیر وزیراعلیٰ نے محکمہ کے امور میں شفافیت، مؤثر نگرانی اور بہتر سروس ڈیلیوری یقینی بنانے کی ہدایت کرتے ہوئے کہا کہ خواتین سے متعلق حکومتی پروگرامز کے ثمرات صوبے کے دور دراز علاقوں تک پہنچائے جائیں۔