مسلم باغ: نائٹروجن کھادوں کی 15 روزہ پابندی پر عملدرآمد، ایکسپائر زرعی ادویات ضبط

مسلم باغ: حکومتِ بلوچستان اور محکمہ زراعت توسیع کی ہدایات کی روشنی میں نائٹروجن کھادوں کی 15 روزہ پابندی پر عملدرآمد کے لیے اسسٹنٹ کمشنر مسلم باغ ماجد سلیم اور محکمہ زراعت مسلم باغ کی ٹیم نے تحصیل مسلم باغ کے مختلف کھاد ڈیلرز کا دورہ کیا۔

دورے کے دوران کھاد ڈیلرز کے پاس موجود نائٹروجن کھادوں کے اسٹاک کا تفصیلی معائنہ کیا گیا اور حکومتی پابندی پر عملدرآمد کا جائزہ لیا گیا۔ ٹیم نے ڈیلرز کو پابندی کے حوالے سے ضروری ہدایات جاری کرتے ہوئے حکومتی احکامات پر مکمل عملدرآمد یقینی بنانے پر زور دیا۔

کارروائی کے دوران ایکسپائر زرعی ادویات بھی برآمد کر کے ضبط کر لی گئیں، جبکہ متعلقہ ڈیلر کو قوانین و ضوابط کی پابندی اور عوام کو معیاری و محفوظ زرعی ادویات کی فراہمی یقینی بنانے کی ہدایت کی گئی۔

اس موقع پر اسسٹنٹ کمشنر مسلم باغ نے کہا کہ حکومت کی جانب سے جاری کردہ احکامات کی خلاف ورزی کسی صورت برداشت نہیں کی جائے گی اور قانون کی خلاف ورزی کرنے والے عناصر کے خلاف ضابطے کے مطابق کارروائی عمل میں لائی جائے گی۔

انتظامیہ کی جانب سے زرعی شعبے میں شفافیت، معیاری اشیاء کی فراہمی اور حکومتی احکامات پر عملدرآمد کے لیے نگرانی کا سلسلہ جاری رہے گا۔