زیارت کے تاریخی جنگلات قومی ورثہ ہیں، تحفظ یقینی بنایا جائے،سردار منظور کاکڑ

کوئٹہ: ال کاکڑ قبائل فیڈریشن کے صدر اور بلوچستان یوتھ فرنٹ کے سیکرٹری جنرل سردار منظور احمد خان کاکڑ نے زیارت کے تاریخی اور عالمی شہرت یافتہ صنوبر کے جنگلات میں مبینہ طور پر درختوں کی کٹائی پر شدید تشویش کا اظہار کرتے ہوئے فوری نوٹس لینے کا مطالبہ کیا ہے۔

اپنے بیان میں سردار منظور احمد کاکڑ نے کہا کہ زیارت کے صنوبر کے جنگلات دنیا کے قدیم ترین قدرتی جنگلات میں شمار ہوتے ہیں، جو صوبے اور ملک کے قدرتی، تاریخی اور ماحولیاتی ورثے کی علامت ہیں۔ ان کا کہنا تھا کہ ان جنگلات کا تحفظ ریاست، حکومت اور متعلقہ اداروں کی قانونی اور اخلاقی ذمہ داری ہے۔

انہوں نے الزام عائد کیا کہ سیکیورٹی کے نام پر صدیوں پرانے صنوبر کے درختوں کی کٹائی کی جا رہی ہے، جو نہ صرف قدرتی ماحول بلکہ قومی ورثے کو بھی نقصان پہنچا رہی ہے۔

سردار منظور احمد کاکڑ نے کہا کہ اگر یہ کٹائی متعلقہ اداروں کی اجازت یا نگرانی میں ہو رہی ہے تو اس کی ذمہ داری انہی اداروں پر عائد ہوتی ہے، جبکہ اگر یہ عمل بغیر اجازت جاری ہے تو یہ نگرانی کے نظام کی ناکامی اور غفلت کو ظاہر کرتا ہے۔

انہوں نے عالمی ماحولیاتی تحفظ کے اداروں سے اپیل کی کہ زیارت کے صنوبر کے جنگلات کے تحفظ کے لیے معاملے کا نوٹس لیا جائے اور درختوں کی کٹائی کا سلسلہ روکا جائے۔