امریکا ایران معاہدے کیلیے سب سے اہم کردار فیلڈ مارشل عاصم منیر نے ادا کیا؛ واشنگٹن پوسٹ

امریکی اخبار واشنگٹن پوسٹ نے اعتراف کیا ہے کہ پاکستان کے فیلڈ مارشل سید عاصم منیر نے امریکا اور ایران کے درمیان کشیدگی کم کرانے اور امن معاہدے کے مسودے کو حتمی شکل دینے میں سب سے کلیدی کردار ادا کیا ہے۔

دی واشنگٹن پوسٹ کے مطابق فیلڈ مارشل سید عاصم منیر نے امریکا، ایران اور خلیجی ممالک کے ساتھ مسلسل رابطے رکھے اور فریقین کے درمیان اعتماد سازی کی فضا بحال کرنے میں مرکزی کردار ادا کیا۔

امریکی اخبار کی رپورٹ میں کہا گیا ہے کہ فیلڈ مارشل سید عاصم منیر کے گزشتہ روز کے ایران کے دورے نے امن معاہدے کے مسودے کی تکمیل اور فریقین کے درمیان اس پر اتفاق کی فضا بھی ہموار کی۔

واشنگٹن ٹائمز نے یہ بھی دعویٰ کیا کہ ہفتے کی صبح معاہدے کے ڈرافٹ پر اہم پیش رفت ہوئی اور فریقین مسودے پر متفق ہوگئے جس کے بعد سفارتی سرگرمیوں میں تیزی آ گئی اور یہ اس وقت ہوا جب فیلڈ مارشل عاصم منیر ایران کے دورے پر تھے۔

ادھر ایک اور امریکی اخبار نیویارک ٹائمز نے بھی فیلڈ مارشل عاصم منیر کے حالیہ دورۂ ایران کو اعلیٰ سطح کی سفارتکاری قرار دیتے ہوئے لکھا کہ پاکستان نے ایران اور امریکا کے درمیان مفاہمت پیدا کرنے میں کلیدی کردار ادا کیا۔

نیویارک ٹائمز کے مطابق بھی پاکستانی قیادت نے خطے میں ممکنہ بڑی جنگ کو روکنے اور مذاکراتی عمل کو آگے بڑھانے کے لیے بیک ڈور ڈپلومیسی کا سہارا لیا۔

گزشتہ روز امریکی وزیر خارجہ مارکو روبیو بھی تصدیق کرچکے ہیں کہ وہ فیلڈ مارشل عاصم منیر سے مسلسل رابطے میں تھے۔

مارکو روبیو نے یہ بھی کہا تھا کہ پاکستان سے ایک اہم اور اعلیٰ شخصیت ایران کا دورہ کرنے والی ہے۔

خیال رہے کہ فیلڈ مارشل سید عاصم منیر دورہ ایران مکمل کرچکے ہیں اور اس کے بعد ہی امریکی صدر نے اپنی نیشنل سیکیورٹی ٹیم کو وائٹ ہاؤس طلب کیا ہے۔

اس میٹنگ کے دوران صدر ٹرمپ پاکستان، سعودی عرب، قطر، متحدہ عرب امارات، ترکیہ اور مصر سمیت مختلف ممالک کے رہنماؤں سے بھی کانفرنس کال پر رابطے کریں گے۔