اسلام کو انتہا پسندی سے جوڑنا لاعلمی کی عکاسی ہے، صدر مملکت

اسلام آباد: صدر مملکت آصف علی زرداری نے کہا ہے کہ اسلام امن، ہمدردی اور انصاف کا دین ہے اور اسے انتہا پسندی سے جوڑنا دراصل لاعلمی کی عکاسی ہے۔

اسلاموفوبیا کے تدارک کا عالمی دن کے موقع پر اپنے پیغام میں صدر مملکت نے کہا کہ دنیا بھر میں مسلمانوں کے خلاف نفرت اور تعصب کے خاتمے کی اشد ضرورت ہے اور عالمی برادری کو نفرت انگیز جرائم کے خلاف قانونی تحفظ کو مزید مضبوط بنانا چاہیے۔ انہوں نے کہا کہ اظہارِ رائے کی آزادی کو نفرت اور تعصب پھیلانے کے لیے استعمال نہیں ہونا چاہیے۔

صدر زرداری نے کہا کہ مذہبی تنوع کے احترام اور بین المذاہب ہم آہنگی کو فروغ دینا وقت کی اہم ضرورت ہے۔ انہوں نے کرائسٹ چرچ مسجد حملے کو انسانیت کے ضمیر کو جھنجھوڑ دینے والا سانحہ قرار دیتے ہوئے کہا کہ پاکستان اسلاموفوبیا کے خلاف عالمی فورمز پر مسلسل آواز بلند کرتا رہا ہے۔

انہوں نے کہا کہ بیرون ملک مقیم پاکستانی مختلف معاشروں کی ترقی میں اہم کردار ادا کر رہے ہیں، تاہم مسلمانوں کے خلاف بڑھتا ہوا تعصب ان کے تحفظ کو متاثر کر سکتا ہے۔

صدر مملکت کے مطابق پاکستان میں اقلیتوں کو مساوی حقوق اور مواقع فراہم کیے جا رہے ہیں۔ نیشنل کمیشن فار مائنارٹیز رائٹس ایکٹ 2025 نافذ کیا جا چکا ہے اور اقلیتوں کے حقوق کے تحفظ کے لیے ایک آزاد نیشنل کمیشن بھی قائم کیا جا رہا ہے۔

آخر میں انہوں نے کہا کہ عالمی برادری کو تعصب کے خاتمے اور مکالمے کے فروغ کے لیے مشترکہ اقدامات کرنے ہوں گے تاکہ مذہبی عقائد کے احترام اور مساوی قانونی تحفظ کو یقینی بنایا جا سکے۔

اسلام کو انتہا پسندی سے جوڑنا لاعلمی کی عکاسی ہے، صدر مملکت