بچوں پر تشدد ناقابلِ برداشت، 10 سالہ طالب علم کا بازو توڑنے والے استاد سمیت 2 ملزمان گرفتار

راولپنڈی: ریس کورس پولیس نے 10 سالہ طالب علم کو مبینہ طور پر تشدد کا نشانہ بنا کر اس کا بازو توڑنے کے الزام میں استاد اور اکیڈمی مالک کو گرفتار کرلیا۔

پولیس کے مطابق پانچویں جماعت کا طالب علم محمد وصام گزشتہ شام ٹیوشن پڑھنے کے لیے نجی اکیڈمی گیا تھا، جہاں مبینہ طور پر استاد طلحہ نے لکڑی کی چھڑی سے اسے تشدد کا نشانہ بنایا۔ تشدد کے نتیجے میں بچے کا بازو ٹوٹ گیا۔

واقعے پر پولیس نے استاد طلحہ اور اکیڈمی کے مالک محمد عثمان کے خلاف مقدمہ درج کرکے دونوں ملزمان کو گرفتار کرلیا۔

ڈی آئی جی آپریشنز فیصل کامران نے کہا کہ تعلیم کے نام پر بچوں پر تشدد کسی صورت برداشت نہیں کیا جائے گا۔ تعلیمی اداروں میں بچوں کے تحفظ اور انہیں باعزت ماحول فراہم کرنا ضروری ہے۔ اساتذہ کی ذمہ داری بچوں کی تربیت کرنا ہے، انہیں جسمانی اذیت دینا نہیں۔