اسرائیل میں سخت انتخابی مقابلہ، نیتن یاہو معمولی برتری کے باوجود حکومت سازی کے لیے کوشاں

تل ابیب: اسرائیل میں پارلیمانی انتخابات کے ابتدائی نتائج کے بعد سیاسی جوڑ توڑ شروع ہوگیا، وزیراعظم بنیامین نیتن یاہو نے دائیں بازو کی جماعتوں پر مشتمل حکومت بنانے کی کوششیں تیز کردیں، تاہم کسی بھی سیاسی اتحاد کو واضح اکثریت ملتی دکھائی نہیں دے رہی۔

نیتن یاہو نے مضبوط قومی دائیں بازو کی حکومت تشکیل دینے پر زور دیتے ہوئے دعویٰ کیا کہ دائیں بازو کی جماعتوں کو عوامی حمایت حاصل ہے۔ دوسری جانب ابتدائی نتائج اور ایگزٹ پولز کے مطابق ان کا اتحاد اپوزیشن پر معمولی برتری رکھتا ہے، لیکن حکومت بنانے کے لیے درکار اکثریت حاصل ہونا ابھی یقینی نہیں۔

ابتدائی اعداد و شمار کے مطابق نیتن یاہو کی لیکوڈ پارٹی کو 20.8 فیصد ووٹ ملے، جبکہ ایزن کوٹ کی یاشار پارٹی 17.06 فیصد ووٹوں کے ساتھ دوسرے نمبر پر رہی۔ نفتالی بینیٹ کے اتحاد ’ٹوگیدر‘ نے 9.2 فیصد ووٹ حاصل کیے۔

عرب جماعتوں کو مجموعی طور پر 18 سے 19 پارلیمانی نشستیں ملنے کا امکان ظاہر کیا گیا ہے، تاہم حکومت سازی میں ان کے کردار کے بارے میں صورت حال واضح نہیں۔

اسرائیلی مرکزی انتخابی کمیٹی کے مطابق ووٹر ٹرن آؤٹ 77.7 فیصد رہا، جسے تقریباً تین دہائیوں کی بلند ترین شرح قرار دیا گیا ہے۔

ووٹوں کی گنتی جاری ہونے کے باعث نتائج میں تبدیلی کا امکان موجود ہے، جبکہ حکومت سازی کے لیے مطلوبہ حمایت حاصل کرنے والے سیاسی اتحاد کا حتمی تعین ہونا ابھی باقی ہے۔