بلوچستان میں محنت کش طبقہ شدید مسائل کا شکار ہے اور ان کی فلاح و بہبود کے لیے فوری اقدامات ناگزیر ہیں ، سکینہ عبداللہ خان سے چوہدری سالک حسین کی ملاقات

لورالائی(میاں محمدعامربشیر آرائیں )پیپلز پارٹی کی صوبائی ڈپٹی انفارمیشن سیکرٹری و ممبر گورننگ باڈی ورکرز ویلفیئر بورڈ بلوچستان سکینہ عبداللہ خان کی وفاقی وزیر اوورسیز پاکستانیز، ہیومن ریسورس ڈویلپمنٹ اینڈ ورکرز ویلفیئر چوہدری سالک حسین سے اہم ملاقات۔
ملاقات میں مزدوروں کو درپیش دیرینہ مسائل پر تفصیلی گفتگو ہوئی، جس میں سکینہ عبداللہ خان نے بلوچستان کے ورکرز اور ایمپلائرز کے تمام مسائل اور مشکلات تفصیل سے وفاقی وزیر کے سامنے رکھے۔
سکینہ عبداللہ خان نے بتایا کہ بلوچستان میں محنت کش طبقہ شدید مسائل کا شکار ہے، لیبر فلیٹس، ڈیتھ گرانٹ، میرج گرانٹ، اسکالرشپس اور ورکرز کی فلاح و بہبود سے متعلق امور میں تاخیر اور بدانتظامی پائی جاتی ہے جس کا فوری حل ناگزیر ہے۔اس موقع پر وفاقی وزیر چوہدری سالک حسین نے ہر طرح کے تعاون کی یقین دہانی کراتے ہوئے کہا کہ انشاء اللہ ورکرز کو ان کے حق کے مطابق تمام سہولیات میسر کریں گے اور بلوچستان کے محنت کشوں کے مسائل کو ترجیحی بنیادوں پر حل کیا جائے گا۔