دادو میں ٹریفک حادثہ، نوڈیرو کا میونسپل ملازم الطاف حسین سیال جاں بحق

نوڈیرو (رپورٹ:عابد بھٹو) نوڈیرو کا رہائشی میونسپل کمیٹی کا ملازم الطاف حسین سیال دادو میں مخدوم بلاول تھانہ کی حدود میں پیش آنے والے روڈ حادثے میں جاں بحق ہوگیا۔ اطلاعات کے مطابق الطاف حسین سیال گزشتہ 24 گھنٹوں سے پراسرار طور پر لاپتہ تھا، جس کے ورثاء ہر جگہ اس کی تلاش کر رہے تھے۔ آج مخدوم بلاول تھانہ کی حدود میں پیٹرول پمپ کے قریب سے اس کے حادثے میں جاں بحق ہونے کی اطلاع موصول ہوئی۔اطلاع ملتے ہی ورثاء لاش وصول کرنے کے لیے دادو روانہ ہوگئے ہیں۔
ورثاء کے مطابق الطاف سعیدی موسانی درگاہ پر حاضری کے لیے گیا تھا، جہاں سے وہ سیہون جا رہا تھا کہ راستے میں تیز رفتار گاڑی کی ٹکر لگنے سے شدید زخمی ہوگیا، جسے فوری طور پر اسپتال منتقل کیا گیا جہاں وہ زخموں کی تاب نہ لاتے ہوئے دم توڑ گیا۔
ورثاء کا کہنا ہے کہ اطلاع کے بعد ہم اسپتال لاش وصول کرنے جا رہے ہیں۔ دوسری جانب مرحوم کے گھر میں کہرام مچ گیا ہے۔