یونیورسٹی آف اوکاڑہ کی دو سالہ ترقی کا اعتراف، ہائر ایجوکیشن منسٹر نے کارکردگی کو سراہا

داخلوں میں 310 فیصد اضافہ، 44 کروڑ روپے کے 13 ترقیاتی منصوبے شروع

شیر گڑھ (نامہ نگار) یونیورسٹی آف اوکاڑہ نے گزشتہ دو سال کے دوران تعلیمی، مالیاتی اور انتظامی شعبوں میں نمایاں ترقی حاصل کی ہے، جس کا اعتراف پنجاب ہائر ایجوکیشن کمیشن کے کمیٹی روم میں منعقدہ یونیورسٹی کی 30ویں سنڈیکیٹ کے اجلاس میں پیش کی گئی کارکردگی رپورٹ میں کیا گیا۔ اجلاس کی صدارت صوبائی وزیر ہائر ایجوکیشن رانا سکندر حیات نے کی، جبکہ رجسٹرار جمیل عاصم نے ایجنڈا پیش کیا اور ڈپٹی ڈائریکٹر پریس، میڈیا اینڈ پبلیکیشنز شرجیل احمد نے جامعہ کی کارکردگی رپورٹ پیش کی۔ رپورٹ کے مطابق گزشتہ دو سال میں داخلوں میں 310 فیصد اضافہ ہوا اور رواں فال سمسٹر میں داخلوں کی تعداد 7 ہزار 85 تک پہنچ گئی۔ یونیورسٹی میں 44 کروڑ روپے کی لاگت سے بنیادی ڈھانچے کی ترقی کے 13 منصوبے شروع کیے گئے، جن میں مرکزی جامع مسجد، اکیڈمک بلاکس، اساتذہ و انتظامی عملے کے لیے رہائشی سہولیات، انڈور کرکٹ ایرینا، چار دیواری اور واکنگ ٹریک شامل ہیں۔ تدریسی و انتظامی اصلاحات کے نتیجے میں وزٹنگ فیکلٹی کے اخراجات 27 کروڑ 80 لاکھ روپے سے کم ہو کر ایک کروڑ 80 لاکھ روپے رہ گئے، جبکہ صوبائی حکومت کی سالانہ گرانٹ پانچ کروڑ روپے سے بڑھ کر تقریباً 50 کروڑ روپے ہو گئی۔ سنڈیکیٹ نے تدریسی و انتظامی عملے کی 62 نئی آسامیوں اور ٹی ٹی ایس کے تحت دو اساتذہ کی ترقی کے کیسز کی منظوری بھی دی۔ اس موقع پر رانا سکندر حیات نے یونیورسٹی کے لیے پنک الیکٹرک بس فراہم کرنے کا اعلان کیا اور بتایا کہ وزیراعلیٰ پنجاب نے نیشنل ہائی وے کی جانب یونیورسٹی گیٹ پر اوورہیڈ پل کی تعمیر کی منظوری دے دی ہے۔ صوبائی وزیر نے وائس چانسلر پروفیسر ڈاکٹر سجاد مبین، رجسٹرار جمیل عاصم اور یونیورسٹی انتظامیہ کی کاوشوں کو سراہتے ہوئے ان اقدامات کو اعلیٰ تعلیم کے فروغ اور طلبہ کو بہتر سہولیات کی فراہمی کے لیے اہم پیش رفت قرار دیا۔ اجلاس میں ایڈیشنل سیکریٹری یونیورسٹیز زاہدہ اظہر، مختلف جامعات کے وائس چانسلرز، اراکین صوبائی اسمبلی، تعلیمی ماہرین اور متعلقہ سرکاری محکموں کے نمائندگان نے شرکت کی۔