ایران امریکا کشیدگی کے دوران عاصم منیر تہران پہنچ گئے، پاکستان کا اہم سفارتی قدم

فیلڈ مارشل سید عاصم منیر ایران کے سرکاری دورے پر تہران پہنچ گئے، جہاں ایرانی اعلیٰ عسکری اور سیاسی قیادت سے ملاقاتوں کے دوران دوطرفہ تعلقات، دفاعی تعاون، سرحدی انتظامات اور خطے کی سکیورٹی صورتحال پر تبادلۂ خیال متوقع ہے۔

عالمی خبر رساں ایجنسی رائٹرز نے ایرانی میڈیا کے حوالے سے بتایا ہے کہ اس دورے کا مقصد خطے میں جاری کشیدگی کے تناظر میں باہمی تعلقات کو فروغ دینا بھی ہے۔

دورے کا ایک اہم پہلو ایران اور امریکا کے درمیان کشیدگی کم کرنے کے لیے پاکستان کی سفارتی اور ثالثی کوششیں ہیں۔ فیلڈ مارشل عاصم منیر کی ایرانی حکام سے ملاقاتوں میں خطے میں امن کے قیام اور کشیدگی میں کمی کے امکانات پر بات چیت متوقع ہے۔

یہ دورہ ایسے وقت میں ہو رہا ہے جب مشرقِ وسطیٰ میں ایران اور امریکا کے درمیان تناؤ خطے کی سکیورٹی صورتحال کو متاثر کر رہا ہے۔ تاہم، ملاقاتوں کے نتائج یا کسی ممکنہ پیش رفت کی تفصیلات سامنے آنے کے بعد ہی صورتِ حال واضح ہو سکے گی۔