روس پر امریکی پابندیوں میں نرمی کے بعد خام تیل معمولی سستا ہو گیا

عالمی منڈی میں خام تیل کی قیمتوں میں معمولی کمی ریکارڈ کی گئی ہے، جس کے بعد برینٹ خام تیل کی قیمت تقریباً ایک فیصد گر کر 108.80 ڈالر فی بیرل پر آگئی۔

رپورٹس کے مطابق پیر کو ایشیائی کاروبار کے آغاز پر تیل کی قیمتوں میں کمی دیکھی گئی۔ اس سے قبل جمعے کو خام تیل کے نرخوں میں اضافہ ہوا تھا اور کاروبار کے اختتام پر قیمتیں 19 مئی کے بعد بلند ترین سطح پر پہنچ گئی تھیں۔

قیمتوں میں کمی امریکی صدر ڈونلڈ ٹرمپ کی جانب سے روس سے متعلق بعض مجوزہ پابندیاں ختم کرنے کے فیصلے کے بعد سامنے آئی۔ رپورٹس کے مطابق ٹرمپ نے جمعے کو ایک ایگزیکٹو آرڈر پر دستخط کیے، جس کے تحت روسی مصنوعات پر ممکنہ محصولات اور روسی تیل و گیس خریدنے والے ممالک کے خلاف مجوزہ پابندیوں میں نرمی کی گئی۔

صدر ٹرمپ کے مطابق اس فیصلے کا مقصد روس کو یوکرین جنگ کے خاتمے کے لیے مذاکرات کے عمل میں شامل رکھنا ہے۔