خیبر پختونخوا پولیس کی تنخواہوں میں اضافے کی سمری گورنر کو ارسال

پشاور: خیبرپختونخوا پولیس کی تنخواہوں میں اضافے اور سیکیورٹی چیلنج الاؤنس دینے سے متعلق سمری گورنر کو ارسال کردی گئی ہے۔ سمری میں جنوبی اضلاع، ڈیرہ اسماعیل خان، بنوں، کوہاٹ ریجن اور تمام ضم شدہ اضلاع کے پولیس اہلکاروں کے لیے بنیادی تنخواہ کے 120 فیصد کے برابر سیکیورٹی چیلنج الاؤنس دینے کی سفارش کی گئی ہے۔
مجوزہ سمری کے مطابق دیگر آباد اضلاع میں تعینات پولیس اہلکاروں کو بنیادی تنخواہ کا 100 فیصد جبکہ ہزارہ ریجن کے اہلکاروں کو 75 فیصد سیکیورٹی چیلنج الاؤنس دینے کی تجویز دی گئی ہے۔
سمری میں مؤقف اختیار کیا گیا ہے کہ خیبرپختونخوا پولیس گزشتہ تین دہائیوں سے دہشت گردی کے خلاف نبرد آزما ہے اور اہلکاروں کی قربانیوں کے باوجود صوبے کی پولیس کی تنخواہیں دیگر صوبوں کے مقابلے میں کم ہیں۔
مجوزہ دستاویز میں پولیس کے سازوسامان اور آلات کو جدید تقاضوں سے ہم آہنگ کرنے کی ضرورت پر بھی زور دیا گیا ہے، تاکہ سیکیورٹی چیلنجز سے مؤثر انداز میں نمٹا جاسکے۔
ڈرافٹ کے مطابق مجوزہ سیکیورٹی چیلنج الاؤنس کی ادائیگی سے ماہانہ اضافی اخراجات 5 ارب 15 کروڑ 90 لاکھ روپے سے تجاوز کرسکتے ہیں۔