آر یو جے پاکستان گوجرہ کے سینئر صحافی امجد اسلام امجد پر قاتلانہ حملہ کی شدید الفاظ میں مذمت کرتی ہے ۔

وزیر اعلیٰ پنجاب صحافی پر تشدد اور مقامی پولیس کے مجرمانہ رویہ کا نوٹس لیں ۔
ملزمان کو فوری گرفتار کیا جائے اور پولیس اہکاروں کو معطل کرکے انکوائری کی جائے ۔ آر یو جے پاکستان
شیرگڑھ (نامہ نگار)ریجنل یونین آف جرنلسٹس پاکستان نے گوجرہ میں سینئر صحافی امجد اسلام امجد پر ہونے والے قاتلانہ حملے اور اس کے بعد مقامی پولیس کی جانب سے مظلوم صحافی ہی کے خلاف کی جانے والی جانبدارانہ و انتقامی کارروائی کی شدید الفاظ میں مذمت کرتے ہیں ۔ریجنل یونین آف جرنلسٹس پاکستان کی سینٹرل ایگزیکٹو کمیٹی کے رکن عابد محمود چوہدری نے کہا ہے کہ یہ امر انتہائی تشویشناک اور قابلِ مذمت ہے کہ حملے میں ملوث ملزمان کو گرفتار کرنے اور قانون کے کٹہرے میں لانے کے بجائے، پولیس نے الٹا متاثرہ سینئر صحافی امجد اسلام امجد کو ہی حراست میں لے لیا اور قانونی و انسانی تقاضوں کو پامال کرتے ہوئے زخمی صحافی کا بروقت طبی معائنہ کروانے میں بھی مبینہ طور پر رکاوٹیں کھڑی کی گئیں، ریجنل یونین آف جرنلسٹس پاکستان اس کی شدید الفاظ میں مذمت کرتے ہوئے وزیر اعلیٰ پنجاب مریم نواز اور انسپکٹر جنرل پولیس پنجاب سے مطالبہ کرتی ہے کہ واقعے کا فوری نوٹس لیں۔ واقعے میں ملوث اصل حملہ آوروں کی فوری گرفتاری کا حکم دیا جائے اور ان کے خلاف سخت قانونی کارروائی کی جائے۔کارروائی میں غفلت کرنے صحافی کو ناحق حراست میں رکھنے اور طبی معائنے میں رکاوٹ ڈالنے والے پولیس اہلکاروں کے خلاف بھی کاروائی کی جائے۔ریجنل یونین آف جرنلسٹس پاکستان نے واضح کیا ہے کہ اگر صحافی امجد اسلام امجد کو انصاف فراہم نہ کیا گیا اور پولیس کے اس رویے کا تدارک نہ ہوا تو ریجنل یونین آف جرنلسٹس پاکستان ملک بھر میں احتجاجی لائحہ عمل اختیار کرنے پر مجبور ہوگی۔