گورنر راج میں حصہ اور گورنر شپ نہ ملنے پر سیاسی جماعت کے سربراہ شدید ناراض ہیں، محسن نقوی

لاہور: وفاقی وزیر داخلہ محسن نقوی نے بغیر نام لیے ایک سیاسی جماعت کے سربراہ کو تنقید کا نشانہ بناتے ہوئے دعویٰ کیا ہے کہ گورنر راج میں حصہ اور گورنر شپ نہ ملنے پر وہ شدید ناراض ہیں۔ ان کے بقول یہی سیاستدان ماضی میں کئی دہائیوں تک اسٹیبلشمنٹ کے سہارے سیاست کرتے رہے ہیں۔

لاہور میں صحافیوں سے غیر رسمی گفتگو کرتے ہوئے محسن نقوی نے کہا کہ ماضی میں مذکورہ سیاستدان اپنی جماعت کے ہوائی ٹکٹوں کے انتظام کے لیے بھی اسٹیبلشمنٹ پر انحصار کرتے تھے، لیکن آج وہی لوگ دوسروں پر انگلیاں اٹھا رہے ہیں۔

وزیر داخلہ نے کہا کہ سیاسی اختلاف اپنی جگہ، تاہم غیر شائستہ زبان اور الزام تراشی کے بجائے سیاسی معاملات پر دلائل اور حقائق کی بنیاد پر بات ہونی چاہیے۔

سابق فاٹا کے اضلاع کے وسائل کے معاملے پر گفتگو کرتے ہوئے محسن نقوی نے سوال اٹھایا کہ جب ان علاقوں کو کئی سال تک ان کا جائز حصہ نہیں مل رہا تھا تو اس وقت بعض سیاسی رہنما خاموش کیوں رہے؟ ان کے مطابق سابق فاٹا کے عوام کے حقوق کا معاملہ سیاسی مفادات سے بالاتر ہونا چاہیے۔

انہوں نے کہا کہ خیبرپختونخوا اس وقت سنگین سیکیورٹی چیلنجز سے دوچار ہے، ایسے حالات میں سیاسی رہنماؤں کو انتشار پھیلانے کے بجائے امن و امان کی بحالی اور دہشت گردی کے خاتمے کے لیے اپنا کردار ادا کرنا چاہیے۔

محسن نقوی نے زور دیا کہ خیبرپختونخوا کو سیاسی محاذ آرائی کے بجائے امن، استحکام اور مشترکہ کوششوں کی ضرورت ہے۔