پشاور اسکول سانحہ: 30 بچوں اور خاتون ٹیچر کی ہلاکت کا مقدمہ درج

پشاور: دیر کالونی کے نجی اسکول کی چھتیں گرنے سے بچوں اور خاتون ٹیچر سمیت 31 افراد کی ہلاکت اور 52 افراد کے زخمی ہونے کے واقعے کا مقدمہ تھانہ آغہ میر جانی شاہ میں درج کرلیا گیا ہے۔ مقدمہ عمارت تعمیر کرنے والے ٹھیکیدار، مالکان اور شیئر ہولڈرز کے خلاف درج کیا گیا ہے۔

ایف آئی آر کے متن کے مطابق اسکول کی عمارت کی تعمیر میں مبینہ طور پر ناقص میٹریل استعمال کیا گیا تھا، جبکہ عمارت بوسیدہ اور غیر موزوں حالت میں تھی۔ مقدمے میں کہا گیا ہے کہ اسکول کی دیواروں اور چھتوں کی خستہ حالی سے متعلق پہلے بھی شکایات کی گئی تھیں، تاہم بچوں کی جانب سے نشاندہی کے باوجود اسکول انتظامیہ نے مبینہ طور پر ان شکایات پر توجہ نہیں دی۔

مقدمے کے مطابق حادثے کے وقت اسکول کی دوسری منزل پر قائم نرسری کلاس اور گراؤنڈ فلور کے کمروں کی چھتیں گر گئیں، جس کے نتیجے میں 30 بچے اور ایک خاتون ٹیچر جاں بحق ہوئے، جبکہ 52 افراد زخمی ہوگئے۔

ایف آئی آر میں بتایا گیا ہے کہ اسکول کی اراضی 16 مرلے پر مشتمل ہے، جو وحید اور جاوید کی ملکیت ہے۔ یہ اراضی 2024 میں لیز پر حاصل کی گئی تھی، جس کے بعد وہاں اسکول کی عمارت تعمیر کی گئی۔ عمارت کی تعمیر اور استعمال ہونے والے میٹریل سے متعلق تفصیلات بھی مقدمے میں شامل کی گئی ہیں۔

پولیس کے مطابق مقدمے میں قتل بالسبب کی دفعہ 322 سمیت تعزیراتِ پاکستان کی دفعات 148 اور 149 شامل کی گئی ہیں۔ واقعے میں نامزد ملزمان کی گرفتاری کے لیے کارروائی شروع کردی گئی ہے۔