نوجوانوں کی ذہنی صحت پر آریا انسٹیٹیوٹ کی آگاہی نشست

کوئٹہ: آریا انسٹیٹیوٹ آف میڈیکل سائنسز کے زیرِ اہتمام بلوچستان یونیورسٹی آف انفارمیشن ٹیکنالوجی، انجینئرنگ اینڈ مینجمنٹ سائنسز (BUITEMS) میں نوجوانوں کی ذہنی صحت کے حوالے سے آگاہی نشست منعقد ہوئی، جس میں تقریباً 200 طلبہ نے شرکت کی۔

نشست کا موضوع ’’سوشل میڈیا، نوجوانوں کی ذہنی صحت اور تعلق کی تلاش‘‘ تھا، جس میں نوجوانوں کی ذہنی صحت، سوشل میڈیا کے اثرات، ذہنی دباؤ اور بروقت مدد حاصل کرنے کی اہمیت پر گفتگو کی گئی۔

مقررین نے بتایا کہ دنیا بھر میں تقریباً ہر سات میں سے ایک نوعمر ذہنی صحت کے مسائل کا سامنا کرتا ہے، جبکہ 15 سے 29 سال کی عمر کے افراد میں خودکشی موت کی بڑی وجوہات میں شامل ہے۔ انہوں نے کہا کہ ذہنی بیماری شرمندگی یا بدنامی کی بات نہیں، بلکہ اس پر کھل کر گفتگو، ہمدردی اور بروقت علاج ضروری ہے۔

نشست میں پینل ڈسکشن بھی ہوئی، جس میں سوشل میڈیا کے دباؤ، نوجوانوں میں تنہائی، احساسِ وابستگی، ذہنی صحت کی ابتدائی علامات اور مدد کے حصول سمیت مختلف پہلوؤں پر تبادلہ خیال کیا گیا۔

ماہرین نے طلبہ، اساتذہ اور والدین پر زور دیا کہ وہ نوجوانوں میں ذہنی صحت سے متعلق ابتدائی علامات کو پہچانیں تاکہ مشکلات سنگین ہونے سے پہلے انہیں مناسب مدد فراہم کی جا سکے۔ مقررین کے مطابق اپنائیت کا احساس اور قابلِ اعتماد رہنمائی نوجوانوں کو نقصان دہ اثرات اور استحصال سے محفوظ رکھنے میں اہم کردار ادا کر سکتی ہے۔

اس موقع پر روشن بھروچہ اور قرۃ العین بختیاری کی شرکت بھی نمایاں رہی۔

نشست کا بنیادی پیغام تھا کہ نوجوان ہماری مشترکہ ذمہ داری ہیں۔ ہمیں انہیں اپنانا، ان کی بات سننا اور ایک پُرامید مستقبل کی جانب ان کی رہنمائی کرنا ہوگی۔

رپورٹ: سمیرا راجپوت، رپورٹر