مستونگ میں فتنہ الہندوستان کے خلاف کارروائی سیکیورٹی فورسز کی پیشہ ورانہ صلاحیتوں کا ثبوت ہے، سرفراز بگٹی

وزیر اعلی بلوچستان میر سرفراز بگٹی نے مستونگ کے علاقوں میں سیکیورٹی فورسز کی جانب سے فتنہ الہندوستان کے خلاف کی جانے والی کامیاب کارروائی پر گہرے اطمینان کا اظہار کیا ہے۔ وزیر اعلی بلوچستان نے کہا کہ فتنہ الہندوستان کے خلاف کامیاب کارروائی سیکیورٹی فورسز کی اعلی پیشہ ورانہ صلاحیتوں کا منہ بولتا ثبوت ہے، اور مستونگ آپریشن میں 5 دہشت گردوں کو جہنم واصل کرنا سیکیورٹی فورسز کی بہترین کارروائی کا مظہر ہے۔انہوں نے مزید کہا کہ دہشت گردوں کے خلاف اس کارروائی میں بھاری مقدار میں اسلحہ و گولہ بارود کی برآمدگی ایک اہم پیش رفت ہے۔ بلوچستان میں دہشت گردی کے مکمل خاتمے کے لیے سیکیورٹی فورسز کی کارروائیاں پوری شدت سے جاری ہیں۔ میر سرفراز بگٹی کا کہنا تھا کہ بلوچستان میں امن و استحکام کے دشمنوں کو کسی صورت رعایت نہیں دی جائے گی، اور دہشت گردی کے خلاف اس جنگ میں سیکیورٹی فورسز کے ساتھ حکومت اور عوام مکمل طور پر متحد ہیں۔وزیر اعلی نے عزم ظاہر کیا کہ دہشت گردی کے مکمل خاتمے تک فتنہ الہندوستان کے خلاف یہ کارروائیاں بلا تعطل جاری رہیں گی۔ بلوچستان کی پرامن سرزمین کو دہشت گرد عناصر سے پاک کرنے کے لیے تمام دستیاب وسائل بروئے کار لائے جا رہے ہیں، اور دہشت گردی کے خلاف جنگ میں سیکیورٹی فورسز کی کامیابیاں انتہائی قابلِ قدر ہیں۔ انہوں نے خبردار کیا کہ امن کے دشمنوں کو بلوچستان میں اپنے کسی بھی مذموم عزائم کی تکمیل کی ہرگز اجازت نہیں دی جائے گی۔