شمالی وزیرستان میں سیکیورٹی فورسز کی کامیاب کارروائی، 13 خوارج جہنم واصل

شمالی وزیرستان: سیکیورٹی فورسز نے شمالی وزیرستان اور گردونواح میں فتنہ الخوارج کے خلاف انٹیلی جنس بیسڈ کارروائی کرتے ہوئے 13 دہشتگردوں کو ہلاک کردیا۔

سیکیورٹی ذرائع کے مطابق فورسز فتنہ الخوارج کے دہشتگردوں کی نقل و حرکت اور مشتبہ ٹھکانوں کی مسلسل نگرانی کر رہی تھیں، جس کے بعد ان کے خلاف مؤثر کارروائی کی گئی۔

ذرائع کا کہنا ہے کہ کارروائی کے دوران شمالی وزیرستان اور گردونواح میں فتنہ الخوارج کے ٹھکانوں کو نشانہ بنایا گیا، جس کے نتیجے میں 13 دہشتگرد مارے گئے۔

وزیراعظم شہباز شریف نے کامیاب کارروائی پر سیکیورٹی فورسز کے افسران اور اہلکاروں کو خراجِ تحسین پیش کرتے ہوئے ان کی پیشہ ورانہ صلاحیتوں کو سراہا۔

وزیراعظم نے کہا کہ دہشتگردی کے مکمل خاتمے اور ملک میں پائیدار امن کے قیام تک فتنہ الخوارج کے خلاف کارروائیاں جاری رہیں گی۔ عزمِ استحکام کے تحت دہشتگردی کے خلاف مؤثر اقدامات ریاست کے غیر متزلزل عزم کا اظہار ہیں۔

شہباز شریف نے کہا کہ وطن عزیز کے امن و سلامتی کو نقصان پہنچانے والے دہشتگردوں کو ان کے مذموم عزائم میں کامیاب نہیں ہونے دیا جائے گا۔