ایندھن مہنگا ہونے کا بوجھ عوام پر منتقل ہوگا؛ حکومت کی آئی ایم ایف کو یقین دہانی

اسلام آباد: حکومت نے عالمی مالیاتی فنڈ (آئی ایم ایف) کو یقین دہانی کرائی ہے کہ ایندھن کی قیمتوں میں اضافے کا بوجھ عوام کو منتقل کیا جائے گا، تاہم کمزور طبقات کو ریلیف دینے کے لیے ٹارگٹڈ سبسڈیز فراہم کی گئی ہیں۔

رپورٹ کے مطابق پاکستان میں موجود آئی ایم ایف مشن نے مالیاتی استحکام یقینی بنانے اور توانائی کے شعبے میں بڑھتے ہوئے گردشی قرضے پر قابو پانے کے لیے مسلسل اقدامات پر زور دیا ہے۔

آئی ایم ایف مشن نے پیٹرولیم لیوی میں کمی کی صورت میں پیدا ہونے والے مالیاتی خلا کو متبادل ذرائع سے آمدن حاصل کرکے پورا کرنے کی ضرورت پر بھی زور دیا۔

پاکستانی حکام نے مؤقف اختیار کیا کہ جاری خلیجی جنگ کے باوجود ساختی اصلاحات کا عمل جاری رکھا جائے گا اور توانائی کے شعبے میں مالیاتی نظم و ضبط برقرار رکھنے کے لیے اقدامات کیے جائیں گے۔

حکام نے آئی ایم ایف کو بتایا کہ ایندھن کی بڑھتی ہوئی قیمتوں کے اثرات سے کمزور طبقات کو تحفظ دینے کے لیے ٹارگٹڈ سبسڈیز متعارف کرائی گئی ہیں، تاکہ ضرورت مند افراد کو مخصوص مالی معاونت فراہم کی جاسکے۔