کوئٹہ میں جناح پیپلز ٹرین کا افتتاح، سریاب سے کچلاک تک سروس شروع

کوئٹہ: وزیراعلیٰ بلوچستان میر سرفراز بگٹی اور وفاقی وزیر ریلوے نے کوئٹہ میں جناح پیپلز ٹرین کا افتتاح کردیا۔

تقریب کے بعد 3 ارب روپے کی لاگت سے شروع کی جانے والی ٹرین سریاب اور کچلاک کے درمیان چلائی جائے گی، جس کے روٹ میں کچلاک، بلیلی، شیخ ماندا، جی او آر، کوئٹہ، لور کاریز اور سریاب سمیت 7 اسٹیشن شامل ہیں۔

جناح پیپلز ٹرین میں دو اے سی کوچز اور ایک پاور وین شامل ہے، جس میں 198 مسافروں کے بیٹھنے جبکہ 60 افراد کے کھڑے ہوکر سفر کرنے کی گنجائش رکھی گئی ہے۔

عوام کی سہولت کو مدنظر رکھتے ہوئے ٹرین کا کرایہ 50 سے 100 روپے کے درمیان مقرر کیا گیا ہے۔ ٹرین سروس کے آغاز سے سریاب، کچلاک اور روٹ میں شامل دیگر علاقوں کے شہریوں کو سفری سہولت میسر آنے کی توقع ہے۔