جی او سی گوادر کا گورنمنٹ بوائز ہائی اسکول گواتری کا دورہ، طلبہ میں نئے جوتے اور نمایاں کارکردگی پر انعامات تقسیم

گوادر ( رپورٹ محمد سلیم رند)

گوادر: کور کمانڈر کوئٹہ کی ہدایت پر جی او سی گوادر نے گورنمنٹ بوائز ہائی اسکول گواتری گوادر کا دورہ کیا، جہاں انہوں نے طلبہ اور اساتذہ کے ساتھ خصوصی نشست کی۔ اس موقع پر طلبہ نے ٹیبلوز، ملی نغمے اور تقریری مقابلوں میں بھرپور حصہ لیتے ہوئے اپنی تخلیقی صلاحیتوں، اعتماد اور بہترین اندازِ اظہار کا مظاہرہ کیا۔ جی او سی گوادر نے اسکول کے تمام طلبہ میں نئے جوتے تقسیم کیے، جس پر بچوں نے خوشی کا اظہار کیا۔ انہوں نے مختلف سرگرمیوں اور تقریری مقابلے میں نمایاں کارکردگی دکھانے والے طلبہ میں انعامات بھی تقسیم کیے اور ان کی حوصلہ افزائی کی۔ جی او سی گوادر نے بچوں کو دل لگا کر تعلیم حاصل کرنے، محنت کرنے اور اپنی صلاحیتوں کو مزید نکھارنے کی تلقین کی، جبکہ اساتذہ کی تعلیمی، تربیتی اور کردار سازی کے حوالے سے خدمات کو بھی سراہا۔ دورے کے اختتام پر انہوں نے طلبہ کو نصابی اور غیر نصابی سرگرمیوں میں بھرپور حصہ لینے اور مستقبل میں ملک و قوم کی ترقی کے لیے اپنا کردار ادا کرنے کا پیغام دیا۔