دہشت گرد بلوچستان میں امن اور بیماریوں کا خاتمہ نہیں چاہتے، بابر یوسفزئی

نوشکی: نوشکی میں پولیو ٹیم کی سکیورٹی پر مامور دو پولیس اہلکار فائرنگ کے واقعے میں شہید ہوگئے۔

معاون برائے داخلہ بابر یوسفزئی نے واقعے کی مذمت کرتے ہوئے کہا ہے کہ فتنۃ الہندوستان نے پولیو ٹیم کی سکیورٹی پر مامور پولیس اہلکاروں کو فائرنگ کرکے شہید کیا۔ انہوں نے کہا کہ پولیو ٹیم پر حملہ بلوچستان کے بچوں کے مستقبل پر حملہ ہے۔

بابر یوسفزئی کا کہنا تھا کہ دہشت گرد عناصر بلوچستان میں امن، ترقی اور بیماریوں کے خاتمے کے مخالف ہیں۔ پولیو ایک خطرناک بیماری ہے جو بچوں میں مستقل معذوری کا سبب بن سکتی ہے، جبکہ ویکسینیشن اس سے بچاؤ کا مؤثر ذریعہ ہے۔

انہوں نے کہا کہ پولیو ورکرز بچوں کو بیماری سے محفوظ رکھنے کے لیے گھر گھر جا رہے ہیں، ان کی حفاظت ریاست اور معاشرے کی مشترکہ ذمہ داری ہے۔ بلوچستان کے بچوں کو دہشت گردی اور بیماری نہیں بلکہ تعلیم، صحت، امن اور روشن مستقبل چاہیے۔

معاون برائے داخلہ نے کہا کہ دہشت گرد عناصر کے عزائم بلوچستان کے بچوں کا مستقبل تبدیل نہیں کرسکتے اور حکومت بچوں کے محفوظ اور صحت مند مستقبل کے لیے پرعزم ہے۔