ڈی پی او حب کا بڑا ایکشن، رشوت کے الزام پر گڈانی کا ایس ایچ او معطل

حب: ڈسٹرکٹ پولیس آفیسر (ڈی پی او) حب نے گڈانی تھانے کے ایس ایچ او کو رشوت لینے کے الزام پر معطل کر دیا۔

پولیس ذرائع کے مطابق ایس ایچ او کے خلاف موصول ہونے والی شکایات کا نوٹس لیتے ہوئے ڈی پی او حب نے فوری کارروائی کی اور انہیں عہدے سے معطل کرنے کے احکامات جاری کر دیے۔ معاملے کی مزید تحقیقات بھی شروع کر دی گئی ہیں۔

ڈی پی او حب نے واضح کیا کہ محکمہ پولیس میں کرپشن، رشوت ستانی اور اختیارات کے ناجائز استعمال پر کسی قسم کی رعایت نہیں برتی جائے گی، جبکہ شفافیت اور قانون کی بالادستی کو ہر صورت یقینی بنایا جائے گا۔

انہوں نے کہا کہ عوام کی شکایات کا فوری ازالہ کیا جائے گا اور قصوروار اہلکاروں کے خلاف قانون کے مطابق سخت کارروائی عمل میں لائی جائے گی۔