ڈی آئی خان؛ رات گئے پولیس چیک پوسٹ پر دہشتگردوں کا بھاری ہتھیاروں سے حملہ، اہلکار زخمی

ڈیرہ اسماعیل خان میں نامعلوم مسلح دہشت گردوں نے رات کی تاریکی میں پولیس چیک پوسٹ کھتی پر بھاری ہتھیاروں سے حملہ کر دیا، جس کے نتیجے میں ایک پولیس اہلکار زخمی ہوگیا۔

پولیس نے فوری اور مؤثر جوابی کارروائی کرتے ہوئے دہشت گردوں کے حملے کو ناکام بنا دیا۔ شدید فائرنگ کے تبادلے کے بعد حملہ آور فرار ہونے پر مجبور ہوگئے۔

پولیس کے مطابق حملے میں ایک کانسٹیبل زخمی ہوا جسے فوری طور پر طبی امداد کے لیے اسپتال منتقل کر دیا گیا۔

واقعے کی اطلاع ملتے ہی ایس پی سٹی ڈویژن مرتضٰی خان بنگش کی قیادت میں پولیس اور کاؤنٹر ٹیررازم ڈیپارٹمنٹ کی بھاری نفری موقع پر پہنچ گئی۔

بعد ازاں علاقے میں سرچ آپریشن شروع کر دیا گیا جبکہ دہشت گردوں کی جانب سے پھینکے گئے دستی بموں اور بارودی مواد کو بم ڈسپوزل یونٹ نے ناکارہ بنا دیا۔