وندر کے قریب ٹریفک حادثے میں شہادتوں پر میر علی حسن زہری کا اظہارِ افسوس

پاکستان پیپلز پارٹی کے سینئر نائب صدر اور ترجمان برائے بلوچستان میر علی حسن زہری نے وندر کے قریب پیش آنے والے المناک ٹریفک حادثے میں ایس ایچ او وندر عبدالسلام مینگل، ان کے بیٹے منظور احمد مینگل اور گن مین عبدالناصر کی شہادت پر گہرے دکھ اور افسوس کا اظہار کیا ہے۔
اپنے بیان میں میر علی حسن زہری نے کہا کہ وندر کے قریب پیش آنے والا یہ انتہائی افسوسناک حادثہ دلخراش ہے۔ ایس ایچ او میر عبدالسلام مینگل ایک بہادر، فرض شناس اور عوام دوست پولیس افسر تھے جنہوں نے اپنی پیشہ ورانہ ذمہ داریاں انتہائی ایمانداری اور لگن کے ساتھ ادا کیں۔ ان کی شہادت سے پولیس فورس اور علاقے کے عوام ایک مخلص اور فرض شناس افسر سے محروم ہو گئے ہیں۔
انہوں نے کہا کہ شہید ایس ایچ او کے فرزند میر منظور احمد مینگل اور گن مین عبدالناصر کی شہادت بھی ایک بڑا سانحہ ہے۔ انہوں نے اپنی جانوں کا نذرانہ دے کر فرض شناسی اور وفاداری کی مثال قائم کی جسے ہمیشہ یاد رکھا جائے گا۔
میر علی حسن زہری نے شہداء کے اہلِ خانہ سے دلی تعزیت اور ہمدردی کا اظہار کرتے ہوئے کہا کہ اس دکھ کی گھڑی میں ہم متاثرہ خاندانوں کے ساتھ برابر کے شریک ہیں۔ انہوں نے دعا کی کہ اللہ تعالیٰ شہداء کو جنت الفردوس میں اعلیٰ مقام عطا فرمائے اور لواحقین کو صبرِ جمیل عطا فرمائے۔ آمین۔