پشاور میں پولیس کی بروقت کارروائی، 11 کلوگرام وزنی پریشر ککر بم ناکارہ بنا دیا گیا

پشاور: پولیس اور بم ڈسپوزل اسکواڈ کی بروقت کارروائی کے باعث پشاور کے گنجان آباد علاقے یکہ توت میں ممکنہ بڑا سانحہ ٹل گیا، جہاں حافظ آباد کے ایک بند مکان سے ملنے والا 11 کلوگرام وزنی پریشر ککر بم ناکارہ بنا دیا گیا۔

پولیس ترجمان کے مطابق ایس پی سٹی پشاور شاہد عدنان اور ایس ایچ او یکہ توت ریاض آفریدی کی نگرانی میں بم ڈسپوزل اسکواڈ کی ماہر ٹیم نے اطلاع ملنے پر فوری کارروائی کی اور مشکوک پریشر ککر کو کامیابی سے ناکارہ بنا دیا۔

پولیس کے مطابق حافظ آباد میں واقع مذکورہ مکان گزشتہ پانچ سے چھ ماہ قبل ایک افغان خاندان کو کرائے پر دیا گیا تھا۔ تعمیراتی کام کے سلسلے میں مکان کھولا گیا تو وہاں مشکوک پریشر ککر موجود پایا گیا، جس کے بعد پولیس کو اطلاع دی گئی۔

واقعے کا مقدمہ درج کرنے کے لیے محکمہ انسدادِ دہشت گردی (سی ٹی ڈی) خیبرپختونخوا کو مراسلہ ارسال کردیا گیا ہے۔

انسپکٹر جنرل آف پولیس خیبرپختونخوا ذوالفقار حمید نے بروقت اور مؤثر کارروائی پر پشاور پولیس اور بم ڈسپوزل اسکواڈ کو شاباش دی۔ انہوں نے کہا کہ گنجان آباد علاقے میں دہشت گردی کا ممکنہ منصوبہ ناکام بنانے سے قیمتی جانوں کو محفوظ رکھنے میں مدد ملی۔

آئی جی پی کا کہنا تھا کہ خیبرپختونخوا پولیس دہشت گردی کے خلاف ڈٹ کر کھڑی ہے اور عوام کے تحفظ کے لیے تمام ممکنہ اقدامات کیے جائیں گے۔