پشاور: پولیس چوکی پر دہشت گردوں کا حملہ پسپا، اہلکار شہید

پشاور: حسن خیل کے علاقے میں سپین میلہ پولیس پوسٹ پر دہشت گردوں کے حملے کے دوران پولیس کی بھرپور جوابی کارروائی میں ایک کانسٹیبل شہید ہوگیا، جبکہ حملہ آور فائرنگ کے تبادلے کے بعد فرار ہوگئے۔

سی سی پی او پشاور کے مطابق دہشت گردوں نے گزشتہ رات سپین میلہ پولیس پوسٹ کو نشانہ بنایا، جہاں ڈیوٹی پر موجود پولیس اہلکاروں نے بہادری اور ثابت قدمی کا مظاہرہ کرتے ہوئے حملہ آوروں کا مقابلہ کیا۔

پولیس کی مؤثر جوابی کارروائی کے نتیجے میں دہشت گرد پسپا ہو کر فرار ہونے پر مجبور ہوگئے۔ حکام کے مطابق جوابی فائرنگ میں متعدد حملہ آوروں کے زخمی ہونے کی اطلاعات بھی موصول ہوئی ہیں، جن کی تصدیق کی جا رہی ہے۔

پولیس حکام کا کہنا ہے کہ واقعے کے بعد علاقے میں سرچ آپریشن شروع کردیا گیا ہے اور فرار ہونے والے دہشت گردوں کی تلاش جاری ہے۔